Bu yil "Qosh tilliq yesliler" namidiki xitay tili ma'aripi üchün 44 ming oqutquchi qobul qilin'ghan

Muxbirimiz ümidwar
2017-11-26
Élxet
Pikir
Share
Print

Xitay da'iriliri bu yil Uyghur diyaridiki "Qosh tilliq yesli" ma'aripini kücheytish meqsitide 4 ming 387 qosh tilliq yesli qurulushini ishqa ashurush bilen birge yene zor sanda oqutquchi qobul qilghan bolup, asasliq qosh tilliq yesli ma'arip nishani Uyghur diyarining jenubigha qaritilghan.

Shinxu'a torining xewiridin melum bolushiche, bu yil Uyghur diyaridiki "Qosh tilliq", yeni emeliyettiki xitay tilliq yesli ma'aripi sahesi üchünla 44 ming 500 neper oqutquchi toluqlan'ghan bolup, hazir bu sahediki oqutquchilar 70 minggha yetküzülgen. Yéza "Qosh tilliq yesliliri" de oquwatqan oqughuchilar sani bir milyon 112mingdin ashurulghan.

Ilgiri qosh tilliq yesliler üchün bir tümendin artuq oqutquchi qobul qilinidighanliqigha a'it xewerlermu otturigha chiqqan idi. Emeliyette, qosh tilliq yesliler üchün bu yil 44 ming oqutquchi toluqlan'ghanliqi ashkarilandi. Gerche, xitay ma'arip da'iriliri bu 44 ming oqutquchining millet nisbiti heqqide éniq uchur tarqatmighan bolsimu, emma xitayning Uyghur diyaridiki qosh tilliq yesliler ehwalidin xewerdar Uyghur ziyaliylirining éytishiche, yéngidin toluqlan'ghan bu oqutquchilarning mutleq köp qismining xitaylar, bolupmu, ichkiri xitay ölkiliridin qobul qilin'ghan bolushi hemde ular yuqiri ma'ash we bashqa nepiqilerdin behrimen qilinishi mumkin iken. Chünki, bu yilning ichide Uyghur diyaridiki mekteplerde Uyghurche we qazaqche tillarni qollinish cheklimige uchrighanliqi ashkarilan'ghan bolup, yeslilerdiki xitay tili oqutush téximu kücheytilgen, hetta yézilargha muqimliq xizmitige ewetilgen kadirlarningmu yéza yesliliride Uyghur perzentlirige xitay tili dersi ötüwatqanliqi, yéza-qishlaqlardiki déhqanlar arisida mejburiliq tüsi alghan xitay tili ögitish xizmiti bilen meshghul boluwatqanliqi melum.

Toluq bet