Үрүмчидә сот хадимлири "қошмақ туғқан болуш" қа чақирилди
Хитай хәлқ ториниң 29-ноябир хәвәр қилишичә, уйғур аптоном районлуқ юқири сот 26-ноябир йәкшәнбә күни "сот хадимлириму қошмақ туғқан болуш" сәпәрвәрлик йиғини ечип, уйғур аптоном районлуқ юқири сотта ишләйдиған һәр бир хизмәтчи хадимниң җәнубий уйғур дияридики ақсу, хотән, қәшқәр вилайәтлиригә қарашлиқ йезилардин өзигә "туғқан тепиши" ни тәвсийә қилған.
Хитай хәвәрлиридин мәлум болушичә "қошмақ туғқан болуш" сиясити уйғур аптоном райониниң йеңидин тәйинләнгән әмәлдари чен чүәнго бу йил 9-айда вәзипигә олтурғандин кейин йолға қоюлған. Хитай таратқулирида "бу сиясәтниң мәқсити 5-июл вәқәсидин буян районда күнсери җиддийлишип бериватқан милләтләр мунасивитини яхшилаш" дәп көрситилгән.
Даириләрниң мәзкур сиясити көзәткүчиләрниң диққитини қозғаватқан болуп, германийәдики диний өлима турғунҗан алавудун әпәнди бу һәқтә тохтилип, мәзкур сиясәттә тилға елинған "кадирлар билән амма арисидики ‹қошмақ туғқан болушта хитай вә уйғурниң бир аилә кишилиридәк болуши' ни тәләп қилиш, диний етиқади вә миллий мәдәнийитидә һечқандақ ортақлиқи болмиған, һәтта бир -бириниң мәдәнийитини йәкләйдиған икки милләт кишилирини сүний һалда достлуқ орнитишқа, һәтта бир дастиханда ғизалинишқа мәҗбурлаш болуп, милләтләр ара қарму-қаршилиқлар ямриған бир җәмийәттә, сүний йосундики ‹қошмақ туғқан' чилиқ тәшвиқатлири һечқанчә үнүм яриталмайду" деди.
- Сәуди әрәбистан һөкүмитиниң һәмдулла вәлийни хитайға қайтуридиғанлиқи илгири сүрүлди
- Қазақистанлиқ адвокат президент тоқайефни тәрәпләр билән дәрһал миллий диалог өткүзүшкә чақирди
- Рәйһан әсәт: "иним әкбәрни вә башқа милйонлиған инсанларни набут қилғанлар җавабкарлиққа тартилидиған күнләр чоқум келиду"
- Тәйвәнлик содигәрниң майтағ һәққидики аччиқ тәсиратлири
- Ялқун рози қатарлиқ тутқундики уйғур зиялийлири үчүн йеңи йил һарписида елан қилинған чақириқлар инкас қозғиди
