Ürümchide sot xadimliri "Qoshmaq tughqan bolush" qa chaqirildi

Muxbirimiz méhriban
2016-11-29
Share

Xitay xelq torining 29-noyabir xewer qilishiche, Uyghur aptonom rayonluq yuqiri sot 26-noyabir yekshenbe küni "Sot xadimlirimu qoshmaq tughqan bolush" seperwerlik yighini échip, Uyghur aptonom rayonluq yuqiri sotta ishleydighan her bir xizmetchi xadimning jenubiy Uyghur diyaridiki aqsu, xoten, qeshqer wilayetlirige qarashliq yézilardin özige "Tughqan tépishi" ni tewsiye qilghan.

Xitay xewerliridin melum bolushiche "Qoshmaq tughqan bolush" siyasiti Uyghur aptonom rayonining yéngidin teyinlen'gen emeldari chén chüen'go bu yil 9-ayda wezipige olturghandin kéyin yolgha qoyulghan. Xitay taratqulirida "Bu siyasetning meqsiti 5-iyul weqesidin buyan rayonda künséri jiddiyliship bériwatqan milletler munasiwitini yaxshilash" dep körsitilgen.

Da'irilerning mezkur siyasiti közetküchilerning diqqitini qozghawatqan bolup, gérmaniyediki diniy ölima turghunjan alawudun ependi bu heqte toxtilip, mezkur siyasette tilgha élin'ghan "Kadirlar bilen amma arisidiki 'qoshmaq tughqan bolushta xitay we Uyghurning bir a'ile kishiliridek bolushi' ni telep qilish, diniy étiqadi we milliy medeniyitide héchqandaq ortaqliqi bolmighan, hetta bir ‏-birining medeniyitini yekleydighan ikki millet kishilirini sün'iy halda dostluq ornitishqa, hetta bir dastixanda ghizalinishqa mejburlash bolup, milletler ara qarmu-qarshiliqlar yamrighan bir jem'iyette, sün'iy yosundiki 'qoshmaq tughqan' chiliq teshwiqatliri héchqanche ünüm yaritalmaydu" dédi.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.

Toluq bet