Кишилик һоқуқ фонди, мода кийимләрниң “қуллар әмгики” мәһсулати икәнлики һәққидә қайта агаһландурди

Вашингтондин мухбиримиз җәвлан тәйярлиди
2023.09.11

9-Айниң 8-күнидин 13-күнигичә өткүзүлидиған “нюйорк мода кийим һәптилики” давам қиливатқанда, кишилик һоқуқ фондиниң қанун вә пирограмма ишлири әмәлдари клодия беннит (Claudia Bennett) “һәптилик хәвәрләр” торида мақалә йезип, мода кийимгә амрақ истемалчиларни “қуллар әмгики” ниң һәққини йемәсликкә агаһландурған.

“сизниң даңлиқ маркилиқ, есил кийимлириңиз қуллар әмгикидин кәлгән, диққәт қилиң! ” намлиқ бу мақалидә, даңлиқ кийимләргә ишлитилгән пахтиниң мәҗбурий әмгәк әң еғир болған уйғур районидин келидиғанлиқи, хитайниң мәҗбурий әмгәккә четишлиқ мәһсулатларни тәкшүрүшкә тосқунлуқ қиливатқанлиқи алаһидә әскәртилгән.

Аптор бу мақалисидә мундақ дәп язиду: “бу йил 8-айда ‛бломберг хәвәрлири‚ тори ‛кишилик һоқуқ фонди‚ аллиқачан билидиған бир ишни хәвәр қилди. У болсиму хитай компартийәси торда бузғунчилиқ қилидиған машина адимини йоллап, бизниң мукапатқа еришкән мәһсулатимиз болған уйғур мәҗбурий әмгикини тәкшүрүш деталиға һуҗум қилди; у детални чүшүрүшкә йол қоймиди, шу арқилиқ кийим ишләнгән җайни, техиму муһими, кимниң у кийимни ишләпчиқарғанлиқини тәкшүрүшкә тосқунлуқ қилди. Бу детал гугилниң қистурма әп деталлири қатарида ишләйдиған детал болуп, уни чүшүрсиңиз сиз алған кийимниң коммунист хитай лагерға соливалған бир йерим милйон адәмдин бириниң қан-тәри сиңгән мәһсулат икәнликини дәп бериду, андин сиздин у кийимни обдан ойлишип елишни тәләп қилиду” .

Мақалидә Shein, Nike, Zara қатарлиқ даңлиқ маркиларниң йәнила америка базирида сетиливатқанлиқи, “ню-йорк мода кийим һәптилики” дә ашу маркидики кийимләрниң көрситилиши мумкинлики, шуниңдәк мәҗбурий әмгәк мәсилиси һәққидә гәп болсила һәммисиниң беши ағрийдиғанлиқи алаһидә тилға елинған. Шуниң билән биргә һазир һәммила ширкәтләрниң мәнпәәткә дүм чүшкәнлики, буниң хитайға пайдилиқ икәнлики, әмма истемалчиларни болсиму “қул әмгики” ниң һәққини йемәсликкә давамлиқ чақиришниң зөрүрлүки тәкитләнгән.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.