Kishilik hoquq fondi, moda kiyimlerning “Qullar emgiki” mehsulati ikenliki heqqide qayta agahlandurdi

9-Ayning 8-künidin 13-künigiche ötküzülidighan “Nyuyork moda kiyim heptiliki” dawam qiliwatqanda, kishilik hoquq fondining qanun we pirogramma ishliri emeldari klodiya bénnit (Claudia Bennett) “Heptilik xewerler” torida maqale yézip, moda kiyimge amraq istémalchilarni “Qullar emgiki” ning heqqini yémeslikke agahlandurghan.

“Sizning dangliq markiliq, ésil kiyimliringiz qullar emgikidin kelgen, diqqet qiling! ” namliq bu maqalide, dangliq kiyimlerge ishlitilgen paxtining mejburiy emgek eng éghir bolghan Uyghur rayonidin kélidighanliqi, xitayning mejburiy emgekke chétishliq mehsulatlarni tekshürüshke tosqunluq qiliwatqanliqi alahide eskertilgen.

Aptor bu maqaliside mundaq dep yazidu: “Bu yil 8-ayda ‛blombérg xewerliri‚ tori ‛kishilik hoquq fondi‚ alliqachan bilidighan bir ishni xewer qildi. U bolsimu xitay kompartiyesi torda buzghunchiliq qilidighan mashina adimini yollap, bizning mukapatqa érishken mehsulatimiz bolghan Uyghur mejburiy emgikini tekshürüsh détaligha hujum qildi؛ u détalni chüshürüshke yol qoymidi, shu arqiliq kiyim ishlen'gen jayni, téximu muhimi, kimning u kiyimni ishlepchiqarghanliqini tekshürüshke tosqunluq qildi. Bu détal gugilning qisturma ep détalliri qatarida ishleydighan détal bolup, uni chüshürsingiz siz alghan kiyimning kommunist xitay lagérgha soliwalghan bir yérim milyon ademdin birining qan-teri singgen mehsulat ikenlikini dep béridu, andin sizdin u kiyimni obdan oyliship élishni telep qilidu” .

Maqalide Shein, Nike, Zara qatarliq dangliq markilarning yenila amérika bazirida sétiliwatqanliqi, “Nyu-york moda kiyim heptiliki” de ashu markidiki kiyimlerning körsitilishi mumkinliki, shuningdek mejburiy emgek mesilisi heqqide gep bolsila hemmisining béshi aghriydighanliqi alahide tilgha élin'ghan. Shuning bilen birge hazir hemmila shirketlerning menpe'etke düm chüshkenliki, buning xitaygha paydiliq ikenliki, emma istémalchilarni bolsimu “Qul emgiki” ning heqqini yémeslikke dawamliq chaqirishning zörürlüki tekitlen'gen.