Даириләр уйғур елида йәнә 5 җайниң қумлашқан район тизимликигә киргәнликини ашкарилиди

Мухбиримиз меһрибан
2016-04-05
Елхәт
Пикир
Share
Принт

Даириләр уйғур аптоном районидики борчин, мори, лоп, йеңисар, бағраш қатарлиқ бәш наһийиниң нуқтилиқ һалда қумни тизгинләш пиланиға киргүзүлгәнликини елан қилди.

Хитайниң тәңритағ ториниң 5-апрел сәйшәнбә күнидики хәвиридә дейилишичә, йеңидин қошулған бу бәш наһийини қошқанда һазирға қәдәр 17 наһийә, шәһәр қумни тизгинләш пиланиға киргүзүлгән, хәвәрдә бу районларниң игилигән көлими 3 милйон 625 миң мо икәнлики баян қилинған. Хәвәрдә йәнә, хитай һөкүмәт даирилириниң 2013 йилдин башлап қумлишишни тизгинләш пиланини йолға қойғанлиқи, шу йили шаяр, қарақаш, пичан, қумул, манас қатарлиқ 6 районда синақ тәриқисидә қумни тизгинләш башланғанлиқи, 2015-йили йәнә җимисар, ават, йопурға, җиминәй, чира, чақилиқ қатарлиқ наһийәләрниң қумлишиш-чөллишишни тизгинләш пиланиға киргүзүлгәнлики тилға елинған.

Материяллардин мәлум болушичә, уйғур елидики бостанлиқларниң қумлишиш-чөллишиш әһвали өткән әсирниң 70 йиллиридин кейин барғанчә күчәйгән. Хитай һөкүмәт даирилири қумлишиш вә чөллишишниң су қислиқи сәвәбидин болғанлиқини етирап қилған болсиму, әмма иҗтимаий сәвәблири һәққидә тохтилиштин өзини қачуруп кәлгән.

Мутәхәссисләр райондики чөллишиш вә қумлишишниң муһим сәвәблириниң бири, изчил елип берилған атом бомбиси синақлиридин башқа йәнә, ишләпчиқириш қурулуш армийисиниң әслидики су мәнбәлириниң баш қисмини боғувелиши, болупму 2000-йиллардин кейин районда ечиливатқан нефит-көмүр, алтун қатарлиқ йәр асти байлиқлириға зиядә көп су сәрп қилғанлиқи икәнлики, шу сәвәбтин тәклимакан бойидики бостанлиқларниң чөллишиватқанлиқи вә җуңғар ойманлиқи әтрапидики яйлақларниң от-чөп үнмәйдиған әһвалларға дучар болуватқанлиқи тәкитлимәктә.

Пикирләр (0)
Share
Толуқ бәт