Қумул шәһиридики 800 дәк мәсчитниң мутләқ көп қисми чеқип ташланған

Мухбиримиз әркин
2018-08-31
Елхәт
Пикир
Share
Принт

Уйғур илиниң қомул шәһиридики 800 дин артуқ мәсчитниң мутләқ көп қисминиң чеқип ташлинип, аран 80 дәк мәсчит сақлап қелинғанлиқи билдүрүлди. Италийәдики «кишилик һоқуқ вә дини әркинликни қоғдаш» намлиқ тәшкилатниң йәрлик учур мәнбәлиригә асасән хәвиридә илгири сүрүлүшичә, хитай даирилири өткән йилдин һазирғичә қумул шәһиридики 800 дин артуқ мәсчитниң мутләқ көп қисмини чеқип ташлап, улардин пәқәт 80 дәк мәсчитни сақлап қалған. Хәвәрдә йәнә, сақлап қелинған мәсчитләрниң қуббиси вә униң һилал ай бәлгилириниң чеқип ташланғанлиқи билдүрүлгән.

Бу йил башлирида «зимистан» намлиқ бир дини әркинлик тор бекити хитай компартийиси мәркизи комитет ишханисиниң «йеңи вәзийәт астидики ислам дини хизмитини күчәйтиш вә өзгәртиш тоғрисидики пикир» намлиқ бир мәхпий һөҗҗитини ашкарилиған. Һөҗҗәттә, мәсчит селишни яки кеңәйтип қурушни бирдәк чәкләш, мәсчитләрни қисқартиш тәләп қилинған. Шуниңдин кейин уйғур аптоном районида «мәсчитләрни ихчамлаш долқуни қозғилип, нурғун мәсчитләр чеқилған. Йеқинда ақсуниң тоқсу наһийиси юлтузбағ базиридики 20 дәк мәсчитниң 11 ниң чеқип ташланғанлиқи мәлум болған иди. «Кишилик һоқуқ вә дини әркинлик» тәшкилатиниң ашкарилишичә, даириләрниң йәнә мәсчит чеқиш һәрикити уйғур районидики туңганлар олтурушлуқ йеза кәнтләргә кеңәйткән. Мәзкур тәшкилатниң йеқинда бәргән хәвиридә, савән наһийисиниң шүймого кәнтидики бир мәсчит чеқип ташланған. Мәзкур мәсчит бу кәнттики бирдин-бир ибадәт орни болуп, хәвәрдә бу кәнттики мусулманларниң мәсчитсиз қалғанлиқини билдүргән. Хәвәр баян қилинишичә, даириләр бу мәсчитни чеқишта һөкүмәтниң һечқандақ бир язма һөҗҗитини көрсәтмигән шундақла йәрлик аһалиләргә алдинала уқтурушму қилмиған. Хәвәрдә. Сақчиларниң бир күни туюқсиз келип, мәсчитни пүтүнләй чиқип ташлиғанлиқи билдүрүлгән.

Пикирләр (0)
Share
Толуқ бәт