“Qurban tulum üchinchi kesip baghchisi” xotende quruldi

Muxbirimiz eziz
2023.02.21

Xitay hökümiti bashqurushidiki “Xitay xewerliri tori” ning 20-féwraldiki xewiride éytilishiche, xoten wilayitining kériye nahiyesidiki toghraghaz yézisida “Qurban tulum üchinchi kesip baghchisi” resmiy qurulghan.

Xewerde éytilishiche, Uyghur diyaridiki eng dangliq “Qizil sayahet rayoni” ning biri bolghan kériye nahiyesi toghraghaz yézisi xitay metbu'atlirida keng teshwiq qilin'ghan “Qurban tulum xatire sariyi” jaylashqan orun hésablinidu. Bu qétim qurulghan üchinchi kesip baghchisigha 20 milyon som (texminen üch milyon amérika dolliridin köprek) meblegh sélin'ghan bolup, nöwette xéridar chaqirish pa'aliyiti bashlinip ketken. Buning bilen xitay ölkiliridiki türlük ishlepchiqirish zawutliri we sodigerler bu heqtiki toxtamlarni bashliwetken. Mezkur üchinchi kesip baghchisi tyenjin shehirining “Shinjanggha yardem bérish qurulushi” diki bir muhim tür bolup, tyenjin shehiri 2020-yilidin buyan mushu “Yardem qurulushi” namida kériye nahiyesi teweside “Jungxu'a kimlikini omumlashturush” xizmitini ahaliler rayoni, mektep rayoni we herqaysi yéza-qishlaqlarda zor derijide kéngeytken. “Tyenjin shehirining shinjanggha yardem bérish aldinqi sep qomandanliq shtabi” ning bash qomandani chén jyen bu heqte muxbirlargha söz qilip “Bu türde bazar arqiliq xéridar chaqirilidu. Hazir 40 nechche shirket bu yerge kélip ish bashlap boldi” dégen. Emma mezkur üchinchi kesip baghchisigha qanchilik yer ishlitilgenliki, bu yerlerning menbesi kimler ikenliki heqqide söz qilinmighan.

Xitay axbarat wasitiliri köp qétim teshwiq qilghan “Shinjanggha nuqtiliq yardem bérish türi” ning bir muhim mezmuni xitayche tildiki yeslilerni köpeytish we xitayche oqutushni kéngeytish, xitay karxana-zawutlirini Uyghur diyarigha yötkep kélip ishlepchiqirish bazisi qurush dégendek türler bolup kéliwatqanliqi melum. Buning bilen xitay shirketliri Uyghur diyarida mehsulat ishlepchiqirip “Mehsulat we meblegh xitaygha éqish, muhit bulghinish shu jayda qélish” sheklide ish körüp kelgen idi. Mushu xildiki yerlik ahalining hayatliq makani bolghan yerlerni igilep ishlepchiqirish zawutlirini qurush hadisisi gardnér léyg (Gardner Leigh) ning 2020-yili neshr qilin'ghan “Mustemlikichilikning iqtisad tarixi” namliq esiride “Mustemlike iqtisadining eng chong alahidiliklirining biri” dep körsitilgenidi.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.