Тәшвиқатчи қурбанҗан сәмәт бейҗиң айродромида хитай сақчилириниң сорақ-соаллириға дуч кәлгән

Үндидар вә фейсбук қатарлиқ иҗтимаий таратқулардин мәлум болушичә, “мән шинҗаңдин кәлдим” намлиқ китабниң аптори қурбанҗан сәмәт чәтәлдики тәшвиқат сәпиридин қайтишида бейҗиң айродромида тутуп қелинип хитай сақчилириниң сорақ-соаллириға дуч кәлгән.

Бейҗиң айродроминиң паспорт контролидики сақчиларниң қурбанҗан сәмәтни айрим өйгә елип кирип тәкшүрүватқан көрүнүши тартилған рәсим түнүгүндин буян иҗтимаий таратқуларда кәң тарқалмақта.

Мәлумки, “мән шинҗаңдин кәлдим” намлиқ китаби билән хитай тәшвиқат саһәсидики даңдар шәхскә айланған қурбанҗан сәмәт бу йил яздин буян америка, японийә, түркийә, мисир вә явропа әллиридә айлинип йүрүп тәшвиқат лексийәси сөзлигән.

Униң лексийәлиридә хитай һөкүмитиниң милләтләр сияситидики аталмиш әвзәлликлири шундақла бир қисим уйғурларниң бу “әвзәллик” тин қандақ пайдилинип өз ғайилирини реаллаштурғанлиқи һәққидики тәшвиқатлар сөзләнгән.

Көзәткүчиләр, хитай һөкүмитиниң сиясий тәшвиқати үчүн думбақ челиватқан қурбанҗан сәмәттәк шәхсләрниңму бейҗиң айродромида тутуп қелинип сорақ қилиниши хитай үчүн һәр қандақ уйғурниң гуман обйекти һесаблинидиғанлиқини чүшәндүрүп бериду, дәп қаримақта.