Xitay hökümiti ürümchini “Quruqluq porti” gha aylandurush qurulushini tézletken

Uyghur aptonom rayonluq hökümet torigha chiqirilghan bir xewerge qarighanda, xitay hökümiti Uyghur rayonini “Bir belwagh bir yol” qurulushining gherbke échilghan derwazisi qilish pilani boyiche, ürümchining “Bir quruqluq porti, besh merkez” qurulushini omumyüzlük tézletken.

Xitay hökümiti ürümchini “Xelq'ara quruqluq porti” gha aylandurush qurulushini yétekchi qilip, bu sheherde qatnash merkizi, mal toshush merkizi, medeniyet-ma'arip merkizi, tébbiy mulazimet merkizi, rayonluq pul-mu'amile merkizi qurushni tézletken؛ shu arqiliq ürümchini xitayning ichi we sirtigha keng échiwétilgen iqtisad, medeniyet, soda almashturush merkizi qilishni emelge ashurmaqchi bolghan.

Ürümchini “Xelq'ara quruqluq porti” gha aylandurush qurulushi 2015-yil bashlan'ghan bolup, 2019-yiligha kelgende 23 döletke mal toshush tügünige aylan'ghan, 2022-yiligha kelgende ürümchidin ottura asiya we yawropagha qatnaydighan poyiz 1165 ke, xelq'ara tashyol arqiliq mal toshuydighan mashina 19 minggha yetken. Ürümchidin bashlinidighan “Awi'atsiye yipek yoli” din qatnaydighan ayropilan heptide 9 qétimgha yetken.

Xewerde yene “Ürümchining ‛bir quruqluq porti, besh merkez” qurulushi tamamlansa, xitay karxaniliri we xelq'araliq karxanilar shinjanggha toplinidu” déyilgen.

Xitay hökümiti Uyghur rayonini “Bir belwagh bir yol” qurulushining eng muhim tügünige aylandurush pilanini alliqachan tüzgen bolup, ürümchini “Xelq'ara quruqluq porti” gha aylandurush da'irilerning eng muhim we yuqiri “Tereqqiyat nishani” bolghan. Amérika jorj washin'gton uniwérsitétining proféssori shan robérts ependi “Bir belwagh bir yol” qurulushining xitaygha iqtisadiy menpe'etla emes, belki siyasiy muqimliq élip kélidighanliqini, chünki xitaydin menpe'et körgen ottura asiya döletlirining Uyghurlarni qanat astigha almaydighanliqini bildürgenidi.