Американиң сабиқ муавин сода вәкили байден һөкүмитини хитайниң қуяш енергийәсигә йөлинип қелиштин қутулушқа чақирди

Мухбиримиз әркин
2022.07.11
Share on WhatsApp
Share on WhatsApp

Американиң сабиқ президенти обама дәвридики муавин сода вәкили роберт һоллейман 9-июл “ню-йорк вақти” гезитидә мақалә елан қилип, байден һөкүмитини хитайниң қуяш енергийәси тахтисиға йөлинип қелиштин қутулушқа чақирған. Роберт һоллейманниң илгири сүрүшичә, америка қуяш енергийәси санаитиниң күчлүк болуши униң зиянлиқ карбон газини кемәйтиш пилани үчүн муһим болсиму, бирақ һазир униң қуяш енергийәси санаитиниң истиқбали бәк парлақ әмәс икән, чүнки америка хитайниң бу саһәни монопол қилишиға йол қоймақтикән.

Роберт һоллейманниң “америка хитайниң қуяш енергийәси санаитимизни езиветишигә йол қойса болмайду” мавзулуқ бу мақалиси, ақ сарайниң бу йил 21-июндин башлап иҗра қилинишқа башлиған “уйғур мәҗбурий әмгикиниң алдини елиш қануни” ни бәк қаттиқ иҗра қилмаслиқ тоғрисида һөкүмәт ичидики бәзи әмәлдарлар вә сода мәнпәәт гуруһлириниң бесимға учраватқанлиқи илгири сүрүлүватқан бир вақитта елан қилинған. Роберт һоллейманниң ейтишичә, американиң күчлүк қуяш енергийәси санаитини бәрпа қилмаслиқи американиң зиянлиқ карбон газни контрол қилиш пиланини хитайға таяндурупла қоймай, бәлки уни хитайниң алдида мудапиәсиз әһвалға чүшүрүп қойидикән.

Роберт һоллейман йәнә әгәр америка сода министирлиқи хитайниң қуяш енергийәси батарийәлирини шәрқий-җәнубий асия дөләтлири арқилиқ қанунсиз рәвиштә тошуватқанлиқини ениқлап чиқмиса, президент байденниң сода қануниға хилаплиқ қилиш һәрикәтлирини қобул қилидиғанлиқи вә җаза йүргүзүштин ваз кечидиғанлиқини билдүргән. Униң ейтишичә, бу сода, тәминләш зәнҗиридики мәҗбурий әмгәк вә дөләт бихәтәрлик мәсилисидә хитайни җавабкарлиққа тартиш күчәйгән бир вақитта униңға йол беридикән. Һоллейман мақалисиниң ахирида мундақ дегән: “қандақ болушидин қәтийнәзәр, бир нәрсә ениқ: ақ сарай вә дөләт мәҗлиси американиң хитай импорт мәһсулатиға тайинишини америкалиқларниң ишқа орунлишиши вә йешил енергийә бихәтәрлики бәдилигә давамлаштуралмайду.”

Көп көрүлгән хәвәрләр
Қисқа хәвәрләр
Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.