Amérikaning sabiq mu'awin soda wekili baydén hökümitini xitayning quyash énérgiyesige yölinip qélishtin qutulushqa chaqirdi

Muxbirimiz erkin
2022.07.11

Amérikaning sabiq prézidénti obama dewridiki mu'awin soda wekili robért holléyman 9-iyul “Nyu-york waqti” gézitide maqale élan qilip, baydén hökümitini xitayning quyash énérgiyesi taxtisigha yölinip qélishtin qutulushqa chaqirghan. Robért holléymanning ilgiri sürüshiche, amérika quyash énérgiyesi sana'itining küchlük bolushi uning ziyanliq karbon gazini kémeytish pilani üchün muhim bolsimu, biraq hazir uning quyash énérgiyesi sana'itining istiqbali bek parlaq emes iken, chünki amérika xitayning bu saheni monopol qilishigha yol qoymaqtiken.

Robért holléymanning “Amérika xitayning quyash énérgiyesi sana'itimizni éziwétishige yol qoysa bolmaydu” mawzuluq bu maqalisi, aq sarayning bu yil 21-iyundin bashlap ijra qilinishqa bashlighan “Uyghur mejburiy emgikining aldini élish qanuni” ni bek qattiq ijra qilmasliq toghrisida hökümet ichidiki bezi emeldarlar we soda menpe'et guruhlirining bésimgha uchrawatqanliqi ilgiri sürülüwatqan bir waqitta élan qilin'ghan. Robért holléymanning éytishiche, amérikaning küchlük quyash énérgiyesi sana'itini berpa qilmasliqi amérikaning ziyanliq karbon gazni kontrol qilish pilanini xitaygha tayandurupla qoymay, belki uni xitayning aldida mudapi'esiz ehwalgha chüshürüp qoyidiken.

Robért holléyman yene eger amérika soda ministirliqi xitayning quyash énérgiyesi batariyelirini sherqiy-jenubiy asiya döletliri arqiliq qanunsiz rewishte toshuwatqanliqini éniqlap chiqmisa, prézidént baydénning soda qanunigha xilapliq qilish heriketlirini qobul qilidighanliqi we jaza yürgüzüshtin waz kéchidighanliqini bildürgen. Uning éytishiche, bu soda, teminlesh zenjiridiki mejburiy emgek we dölet bixeterlik mesiliside xitayni jawabkarliqqa tartish kücheygen bir waqitta uninggha yol béridiken. Holléyman maqalisining axirida mundaq dégen: “Qandaq bolushidin qet'iynezer, bir nerse éniq: aq saray we dölet mejlisi amérikaning xitay import mehsulatigha tayinishini amérikaliqlarning ishqa orunlishishi we yéshil énérgiye bixeterliki bedilige dawamlashturalmaydu.”

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.