Японийә хитайниң қарши турушиға қаримай, рабийә қадир ханимға виза бәргән

Мухбиримиз әркин
2019-06-21
Share

Японийә хитайниң қаттиқ қарши турушиға қаримай, уйғур рәһбири рабийә қадир ханимға виза берип, униң келәр һәптә японийәдә өткүзүлидиған 20 дөләт башлиқлириниң йиғини җәрянида сиясий паалийәтләргә қатнишишиға йол қойған. японийә кйото агентлиқиниң 21‏-январ хәвәр қилишичә, рабийә ханимниң японийәдики қоллиғучилири униңға виза берилгәнликини билдүргән. 20 Дөләт башлиқлириниң йиғини 28‏-вә 29 ‏-июн күнлири японийәниң осака шәһиридә өткүзүлиду. Йиғинға америка президенти трамп, хитай рәиси ши җинпиң, түркийә президенти әрдоғанни өзи ичигә алған дунядики иқтисади әң күчлүк 20 дөләтниң рәһбири иштирак қилиду. Бу қетимқи башлиқлар йиғини хитай һөкүмити 2 милйондәк уйғур вә башқиларни йиғивелиш лагерлириға қамап, уйғурларниң мәдәнийити, тили, диний етиқади вә турмуш усулиға қаттиқ бузғунчилиқ қиливатиду дәп әйиблиниватқан бир мәзгилдә ечилиду.

Кйото агентлиқиниң хәвиридә, нөвәттә “әркин һинди-тинч окян иттипақи” намлиқ бир бирләшмә тәшкилатниң рәһбәрлик вәзиписини өтәватқан рабийә қадир ханимниң японийәдә хитайниң кишилик һоқуқ дәпсәндичиликигә қарши бир қатар паалийәтләрни пиланлиғанлиқи, униң зиярити хитай рәиси ши җинпиңниң осакаға келиши билән бир мәзгилгә тоғра кәлгәнлики билдүрүлгән. Хәвәрдә қәйт қилинишичә, японийә һөкүмәт мәнбәлири рабийә қадирниң 7‏-июн күни визиға илтимас қилғанлиқи, униң японийәдә 10 қетимдин артуқ зиярәттә болғанлиқи, униңға виза бәрмәсликниң һечқандақ қануни сәвәби йоқлуқи көздә тутулуп, униң визисиниң чаршәнбә күни берилгәнликини билдүргән. Лекин, униң қоллиғучилириниң кйото агентлиқиға билдүрүшичә, униң бу қетим виза елишиға узунрақ вақит кәткән. 

Һөкүмәт учур мәнбәлириниң кйото агентлиқиға бәргән учуриға қариғанда, хитай тәрәп өткән йили 12‏-айда токйодин ши җинпиң японийәни зиярәт қилғанда рабийә қадирниң японийәгә киришини “мувапиқ” бир тәрәп қилиши” ни тәләп қилған. Хәвәрдә қәйт қилинишичә, бу тәләпни хитай дөләт бихәтәрлик министирлиқи биваситә японийә баш министири шинзо абениң ишханисиға йәткүзгән икән.

Пикирләр (0)

Барлиқ пикир - баянларни көрүш.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.

Толуқ бәт