Yaponiye xitayning qarshi turushigha qarimay, rabiye qadir xanimgha wiza bergen

Muxbirimiz erkin
2019-06-21
Élxet
Pikir
Share
Print

Yaponiye xitayning qattiq qarshi turushigha qarimay, Uyghur rehbiri rabiye qadir xanimgha wiza bérip, uning kéler hepte yaponiyede ötküzülidighan 20 dölet bashliqlirining yighini jeryanida siyasiy pa'aliyetlerge qatnishishigha yol qoyghan. Yaponiye kyoto agéntliqining 21‏-yanwar xewer qilishiche, rabiye xanimning yaponiyediki qollighuchiliri uninggha wiza bérilgenlikini bildürgen. 20 Dölet bashliqlirining yighini 28‏-we 29 ‏-iyun künliri yaponiyening osaka shehiride ötküzülidu. Yighin'gha amérika prézidénti tramp, xitay re'isi shi jinping, türkiye prézidénti erdoghanni özi ichige alghan dunyadiki iqtisadi eng küchlük 20 döletning rehbiri ishtirak qilidu. Bu qétimqi bashliqlar yighini xitay hökümiti 2 milyondek Uyghur we bashqilarni yighiwélish lagérlirigha qamap, Uyghurlarning medeniyiti, tili, diniy étiqadi we turmush usuligha qattiq buzghunchiliq qiliwatidu dep eyibliniwatqan bir mezgilde échilidu.

Kyoto agéntliqining xewiride, nöwette "Erkin hindi-tinch okyan ittipaqi" namliq bir birleshme teshkilatning rehberlik wezipisini ötewatqan rabiye qadir xanimning yaponiyede xitayning kishilik hoquq depsendichilikige qarshi bir qatar pa'aliyetlerni pilanlighanliqi, uning ziyariti xitay re'isi shi jinpingning osakagha kélishi bilen bir mezgilge toghra kelgenliki bildürülgen. Xewerde qeyt qilinishiche, yaponiye hökümet menbeliri rabiye qadirning 7‏-iyun küni wizigha iltimas qilghanliqi, uning yaponiyede 10 qétimdin artuq ziyarette bolghanliqi, uninggha wiza bermeslikning héchqandaq qanuni sewebi yoqluqi közde tutulup, uning wizisining charshenbe küni bérilgenlikini bildürgen. Lékin, uning qollighuchilirining kyoto agéntliqigha bildürüshiche, uning bu qétim wiza élishigha uzunraq waqit ketken. 

Hökümet uchur menbelirining kyoto agéntliqigha bergen uchurigha qarighanda, xitay terep ötken yili 12‏-ayda tokyodin shi jinping yaponiyeni ziyaret qilghanda rabiye qadirning yaponiyege kirishini "Muwapiq" bir terep qilishi" ni telep qilghan. Xewerde qeyt qilinishiche, bu telepni xitay dölet bixeterlik ministirliqi biwasite yaponiye bash ministiri shinzo abéning ishxanisigha yetküzgen iken.

Toluq bet