Uyghur rehbiri rabiye qadir xanim qatarning 37 dölet tizimlikidin chékin'genlikige minnetdarliq bildürdi

Muxbirimiz erkin
2019.08.23

Uyghur rehbiri, xelq'ara kishilik hoquq we démokratiye fondining qurghuchisi rabiye qadir xanim 22‏-awghust bayanat élan qilip, qatarning Uyghur mesiliside xitayni qollighan 37 dölet tizimlikidin chékin'genlikige minnetdarliq bildürdi. Bayanatta qeyt qilinishiche, “Qatarning 37 dölet tizimlikidin chékinishi yalghuz lagérlar mesiliside Uyghurlargha hésdashliq bildürüsh bolupla qalmay, eng muhimi qatarning dölet obrazini qoghdaydiken”.

Yéqinda gherbtiki 22 dölet b d t kishilik hoquq kéngishige ortaq mektup yollap, xitayning Uyghur rayonidiki yighiwélish lagérlirini derhal taqishini, lagérdiki tutqunlarni qoyup bérishini telep qilghan. Arqidinla se'udi erebistan, misir, pakistan, süriye, sudan, tajikistan, qatarliq musulman döletlirini öz ichige alghan 37 dölet ortaq mektup yollap, xitayning Uyghur rayonidiki siyasitini qollaydighanliqini bildürgen. Xitay hökümiti 2 milyondek Uyghur, qazaq qatarliq musulmanlarni yighiwélish lagérlirigha qamap, ularning diniy étiqadi, tili, medeniyitini omumyüzlük cheklewatqan bir waqitta, bu 37 döletning xitayni qollishi xelq'arada ghulghula qozghighan. Bu döletler kishilik hoquq teshkilatlirining qattiq eyiblishige uchrighanidi.

Rabiye qadir xanim bayanatta, qatarning bu qararini tebrikleydighanliqi, qatar emiri tamim hamad eltanigha minnetdarliq bildüridighanliqini tekitlep, qalghan “36 Dölet erbablirini؛ bolupmu islam döletliri rehberlirini mushu sa'etlerde lagérlarda qamilip yatqan, lagérning jaza tedbirliri netijiside hali xarablashqan 3 milyon insanning séymasini köz aldigha keltürüshke we lagérlar mesiliside öz wijdanlirigha bir so'al qoyup béqishqa dewet qilghan”.

Uyghur aptonom rayoni rehberliri yéqinda lagérlardiki 90 % tutqunning qoyup bérilgenlikini élan qilghan. Emma ularning bu sözining rastliqi guman qozghighanidi.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.