Rabiye qadir xanim amérika awam palata re'isi nensi pilusi bilen körüshken

Muxbirimiz erkin
2019-09-20
Share

Dunya Uyghur qurultiyining sabiq re'isi, “Uyghur xelq'ara kishilik hoquq we démokratiye fondi” ning qurghuchisi rabiye qadir xanim 19‏-séntebir küni amérika dölet mejliside awam palatasining re'isi nensi pilusi xanim bilen körüshüp, Uyghurlarning nöwettiki weziyiti we özining hazirghiche iz-dériki bolmighan a'ile ezalirining ehwali heqqide söhbet élip barghan.

Bu qétimliq körüshüshning kimning iltimasigha bina'en élip bérilghanliqi melum emes. Emma nensi pilusi xanim 19‏-séntebir küni özining twittér hésabida rabiye qadir xanim bilen chüshken resimini hembehirlep, “Bügün amérika dölet mejliside qedirlik dostum, pa'aliyetchi we rehber rabiye qadirni Uyghur xelqining namida kütüwélip, uning iz-dériki bolmighan a'ile ezalirining ehwali we Uyghur xelqi duch kéliwatqan weziyet heqqide muzakirilerde bolghanliqimdin pexirlinimen” dep yazghan. 

Amérikaning siyasiy sehnisidiki ‏3-nomurluq shexs bolghan nensi pilusi xanimning “Uyghur kishilik hoquq siyasiti qanun layihisi” ning awam palatadiki nusxisi awazgha qoyulushni kütüp turghan bir mezgilde rabiye qadir xanim bilen körüshüshi diqqet qozghidi. Nensi pilusi xanim “Uyghur kishilik hoquq siyasiti qanun layihisi” ge imza qoyup, uni aktip qollawatqan awam palata ezalirining biri. U bu yil yazda washin'gtonda ötküzülgen bir yighinda “Eger amérika Uyghur mesilisige awazini chiqarmisa, kishilik hoquq mesiliside özining xelq'aradiki nopuzini yoqitip qoyidighanliqi” ni agahlandurghan idi. Mezkur qanun layihisining yene bir nusxisi buningdin bir qanche kün awwal kéngesh palatasida maqullan'ghan idi. Qanun layihisining kéngesh palatasida maqullinishi bilen kishilerning diqqiti awam palatasigha buralghan idi. Ikkiylen körüshkende qanun layihisining küntertipke kelgen-kelmigenliki melum emes. Kéngesh palatasi mezkur qanun layihisini maqullighandin kéyin kishilik hoquq teshkilatliri we kéngesh palatasining bezi ezaliri qanun layihisining awam palatasida tézrek maqullinishini telep qilghan idi.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.

Toluq bet