Rabiye qadir xanim hindonéziye xelqining Uyghurlarni qollishigha teshekkür éytti

Muxbirimiz eziz
2018-12-25
Élxet
Pikir
Share
Print

Uyghur jem'iyiti duch kéliwatqan éghir basturushlar gherb dunyasidiki herqaysi hökümetlerning diqqitide boluwatqanda hindonéziyediki keng musulmanlar jama'iti we hindonéziye hökümiti Uyghurlar mesilisini tekitlep kelgen hemde mushu sewebtin zor kölemlik namayish teshkilligen idi.

24-Dékabir küni Uyghur milliy herikitining rehberliridin rabiye qadir xanim "Uyghur waqti" torida ochuq xet élan qilip, hindonéziye xelqining Uyghurlarni qollighanliqigha chongqur teshekkür bildüridighanliqini éytti. Shuningdek jakartadiki xitay elchixanisining bu heqtiki bayanatigha inkas qayturdi.

Rabiye qadir xanim mezkur ochuq xette hindonéziyediki keng musulmanlar jama'itining we hindonéziye ölimalar kéngishining hindonéziye hökümitini Uyghurlar mesiliside heqqaniyetni yaqlashqa dewet qilghanliqini qizghin alqishlidi. U xétide bu heqte toxtilip, "Hindonéziyediki musulman qérindashlarning awazi musulmanlar dunyasining oyghaq ikenlikini, musulmanlarning öz qérindashliri zulumgha uchrighanda qarap turmaydighanliqini yene bir qétim körsetti. Shunga sherqiy türkistandiki eng zulmetlik künlerni körüwatqan xelq silerning qérindashlarche yetküzgen hemdertlikinglarni menggü untumaydu," dédi.

Melum bolushiche, hindonéziyede Uyghurlarning zulumgha uchrishi heqqidiki jama'et pikiri yuqiri pellige chiqqanda jakartadiki xitay elchixanisi buninggha izahat bérip ularning "Pitne-pasatlargha ishenmeslikini ümid qilghan." shuningdek "Kespiy téxnika mektipi" dikilerning hüner-téxnika öginiwatqan oqughuchilar ikenlikini éytqan. Rabiye qadir xanim bu qétimqi xette bu heqte toxtilip, "Eger ashu lagérlar rastinila mektep bolsa néme üchün u yerdiki oqughuchilar öylirige qaytalmaydu? némishqa bu mektepler tikenlik sim tosuq bilen qorshilidu? néme üchün oqughuchilarning béshigha qara xalta kiydürülidu?" dégendek bir qatar so'allarni qoyidu.

Toluq bet