Xitay hökümiti “Ürümchi-qaramay-sanji rayonini rawajlandurush” pilanini zor küch bilen ijra qilmaqchi

Xitay hökümitining karniyi bolghan shinxu'a agéntliqining 21-marttiki xewiride éytilishiche, Uyghur aptonom rayoni boyiche “Ürümchi-qaramay-sanji rayonini yuquri süpette tereqqiy qildurush neq meydan yighini” ürümchide chaqirilghan. Yighinda Uyghur aptonom rayonluq partkomning sékrétari ma shingruy “20-Qurultayning rohini qet'iy we toluq özleshtürgen halda yéngi süpettiki tereqqiyat mélodiyisini yangritish we omumiyüzlük yuquri süpette rawajlandurushni emelge ashurush” ni tekitligen.

Xewerde éytilishiche, bu qétimqi yighin'gha Uyghur aptonom rayonluq partkom we hökümetning asasliq rehberliri, shundaqla ürümchi, sanji, qaramay qatarliq sheherlerning rehberliri, shuningdek bingtu'en qarmiqidiki 8-, 11-, 12-diwéziyelerning asasliq rehberliri toluq qatnashqan bolup, bu hal bu qétimqi yighinning bir qétimliq omumiy wezipe élan qilish xaraktéride ikenlikini eks ettürgen.

Yighinda bu qétimqi “Birleshme rayon tereqqiyati” nishanining “Döletning aliy menpe'eti” ge, jümlidin “Bir belwagh bir yol” qurulushining ongushluq emelge éshishigha, xitaydiki “Omumiyüzlük zamaniwilashqan sotsiyalizim qurush nishani” gha, shu arqiliq xitayche alahidilikke ige zamaniwilishish qurulushini algha sürüshke munasiwetlik chong mesile ikenliki nuqtiliq otturigha qoyulghan.

Yéqinqi yillarda xitay bilen gherb dunyasi otturisidiki siyasiy we iqtisadiy munasiwetler barghanséri yirikliship méngiwatqanliqi, shuningdek tajsiman wirus yuqumi keltürüp chiqarghan bir qatar mesililer tüpeylidin xitayning iqtisadiy sahediki chékinishi barghanséri ashkara boluwatqanliqi melum. Shu qatarda xitay hökümitining “Bingtu'en bilen yerlikni birleshtürüsh” sho'ari astida Uyghur diyarini xitayning asasliq ishlepchiqirish bazisigha aylandurushi hemde bingtu'enni kéngeytip xitay nopusini köchürüshni tézlitishi buningdiki hel qilish charilirining biri, dep qaralmaqta. Radiyomiz ziyaritini qobul qilghan mutexessislerdin doktur adryan zénz: “Xitay hökümiti hazir shimaliy shinjang rayonidiki siyasiy, iqtisad we nopus qurulmisi endizisini mustehkemlep, bularni tedriji jenubiy shinjanggha tedbiqlashni jiddiy tedbir qatarida ijra qiliwatidu” dégen idi.