“Rezil bambuk” tor hujumchisining Uyghurlar we tibetlerni nishan qiliwatqanliqi pash boldi

Washin'gtondin muxbirimiz eziz teyyarlidi
2023.09.26

Kompyutér tor hujumliridin mudapi'e körüsh sahesidiki dangliq shirketlerdin bolghan “Woléksitiy” (Volexity) shirkiti birnechche yilliq iz qoghlap tekshürüsh arqiliq “Rezil bambuk” (ilgiri “Közi yaman” depmu atalghan) namidiki tor hujumchisining Uyghurlar we tibetlerni, shuningdek bir qisim teywenliklerni “Ow nishani” qilip kelgenlikini bayqighan.

“Xakkérlar xewerliri” torining 25-séntebirdiki xewiride éytilishiche, “Rezil bambuk” dep nam bérilgen mezkur tor hujumchisi Uyghur we tibet pa'aliyetchilirini nishan qilidighan bolup, ular saxta tor betliri yasash we saxta ijtima'iy taratqu hésabatliri arqiliq qarigha élin'ghan nishanni özige jelp qilidiken. “Nishan” mana mushu “Rezil bambuk” achqan tor betni yaki hésabatni ziyaret qilghanda alahide teyyarlan'ghan jasusluq yumtalliri bu torbetlerdin aptomatik halda ashu kishining “Alma” (Apple) yaki “Androyid” (Android) téléfon'gha ornitilidiken. Uningdin kéyin bu téléfon arqiliq “Owning ikkinchi qedimi” otturigha chiqidiken.

“Woléksitiy” shirkiti ötken hepte élan qilghan bu heqtiki mexsus doklatta éytilishiche, “Rezil bambuk” namliq tor hujumchisi chet'ellerdiki topluqlarda mewjut bolghan “Ow nishani” ning hésabini yuqiriqi usulda qolgha chüshürüp bolghandin kéyin, “Signal” (Signal) yaki “Télégramma” (Telegram) qatarliq alaqilishish supilirida ashu kishining namida bir top quridiken. Andin bu topqa qoshulghanlargha wirus pirogrammiliri qachilinip, téximu keng kölemlik “Ow” otturigha chiqidiken.

“Woléksitiy” shirkitining mes'ulliridin kallum roksan (Callum Roxan) bu heqte toxtilip “Bu xildiki qilmishlar ‛télégramma‚ we ‛signal‚ da, shuningdek ‛wats'ep‚ (WhatsApp) munbiride eng köp bayqaldi. Hujumchilar herqachan féysbok (Facebook) , instigram (Instagram) , réddit (Reddit) , X (yeni burunqi tiwéttér) we yutub (YouTube) qatarliqlarda saxta hésab achidu” dégen.

Xewerde éytilishiche, mezkur tor hujumchisi “Nachar bazar” (BADBAZAAR) namida “Gugil” bazirigha chiqirip qoyghan ep asasen Uyghurlarni we musulmanlarni nishan qilidighan bolup, bu xil eplerni chüshürgenler asasen oxshash hujumgha uchrap kelgen.  

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.