Erkin asiya radiyosi döletlik axbarat kulubida muhakime yighini ötküzdi

21-Séntebir küni amérika paytexti washin'gtondiki “Döletlik axbarat kulubi” da erkin asiya radiyosi sahibxaniliqida mexsus muhakime yighini chaqirildi. Yighinda Uyghurlarning nöwettiki qirghinchiliqqa qarshiliq körsitish tirishchanliqi hemde muhajiret muhitida Uyghur jama'et topini qurup chiqish ehwali tonushturuldi. Shuningdek muxbirlarning bu heqtiki so'allirigha jawab bérildi.

RFA/Shehrizad

“Kechmishlerni sözleshning qudriti: Uyghurlarning mewjutluq hékayisi” témisidiki yighinda jorj washin'gton uniwérsitétining piroféssori shan robérts (Dr. Sean R. Roberts),  aq saray qarmiqidiki dölet xewpsizlik kéngishi xitay bölümining sabiq diréktori elnigar ilteber, yétiliwatqan Uyghurshunas elis andérson (Dr. Elise Anderson), erkin asiya radiyosi Uyghur bölümining mudiri alim séytof qatarliqlar eziz méhman qatarida ayrim-ayrim söz qildi. Shundaqla Uyghur jem'iyiti duch kéliwatqan türlük qabahetlerge Uyghurlarning qandaq shekiller arqiliq qarshiliq körsitip kéliwatqanliqi heqqidiki ehwallarni tonushturdi.

Yighinning échilish murasimida erkin asiya radiyosining pirézidénti bay fang xanim söz qilip “Radiyomizning Uyghur bölümi dunyagha Uyghur qirghinchiliqini pash qilghan yégane we musteqil axbarat orginidur” dédi. Amérika dölet mejlisi qarmiqidiki “Amérika-xitay istratégiyelik riqabet pewqul'adde komitéti” ning re'isi mayk gallagér (Mike Gallagher) bu qétimqi yighin'gha ewetken widiyoluq sözide erkin asiya radiyosining ötken 28 yilliq musapisige nahayiti yuqiri baha berdi. U sözide “ Xitayning bu tömür perdisi haman bir küni ghulap chüshidu” dep körsetti.

RFA/Shehrizad

Yighinda yene erkin asiya radiyosi ishligen bu heqtiki höjjetlik filimning birinchi qismi yighin ehlige qoyup bérildi. Buningda Uyghur diyaridiki qirghinchiliq sewebidin uruq-tughqanliridin juda bolghan hemde türlük rohiy asaretke giriptar bolghan türkiyediki Uyghur muhajirlirining bu xil bésimlargha qarshi türlük hel qilish charilirini tépip chiqish tirishchanliqi teswirlen'gen. Piroféssor shan robértis bu heqte söz qilip “Xitay kompartiyesi hazir sayahetchilik teshwiqatini qaytidin otturigha chiqiriwatidu.  Shundaqla sayahetchilikning sholisi arqiliq bu rayonda némilerning boluwatqanliqini untuldurmaqchi boluwatidu. Rastini désem hazir héchqandaq söz qilish erkinliki qalmighan bu makanda bir Uyghur bolushning qandaq ish ikenlikinimu tesewwur qilalmaymen” dédi.