Marko rubiyo b d t ning kishilik hoquq doklatini élan qilishini telep qilghan

Amérika dölet mejlisi kéngesh palata ezasi marko robiyo b d t kishilik hoquq aliy komissari mishél bachélétqa xet yézip, Uyghur rayonining kishilik hoquq ehwali heqqidiki doklatni derhal élan qilishni telep qilghan.

Marko robiyo mishél bachélétqa yazghan xétide mundaq dégen: “Siz 8-ayning 31-küni wezipingizdin ayrilish aldida turuwatisiz, emma bu doklat téxiche kömülgen yéride turuwatidu. Xewerlerdin bilishimizche, xitay diplomatliri astirtin yol méngip bu doklatning élan qilinishigha tosqunluq qiliwétiptu. Xitay kompartiyesining bu doklatni ashkarilashni bir minut bolsimu kéchiktürüshige we sheningizge téximu dagh tegküzüshige yol qoymasliqingiz kérek. Men dölet mejlisi xam chot ajritish komitétining bir ezasi bolush süpitim bilen, amérikaning b d t gha ajritiwatqan pulining nege kétiwatqanliqini tekshürimen we ishxaningizni bu doklatni derhal élan qilishqa chaqirimen”.

U yene mektupida b d t kishilik hoquq ishxanisining öz rolini tüzük ada qilalmighanliqini eskertip: “Xitay kompartiyesining irqiy qirghinchiliq jinayitini baldurraq ashkarilap, ularning Uyghurlar we bashqa milletlerge qiliwatqan kishilik hoquq jinayetlirini xatirilep qoyush kérek idi” dégen we amérika hökümitining u jinayetlerni alliburun irqiy qirghinchiliq jinayiti dep békitip bolghanliqini tekitligen.

2018-Yil b d t kishilik hoquq aliy komissari ishxanisi kommunist xitay hökümitining Uyghur rayonidiki kishilik hoquq jinayetliri heqqide bir doklatni teyyarlighanidi؛ 4 yil ötüp ketken we mishél bachélét Uyghur rayonini körüp kelgen bolsimu bu doklat téxi élan qilinmighan. Melumatlargha qarighanda, xitay hökümiti bu doklatni élan qilmasliqqa bésim qiliwatqan bolup, nöwette bu doklatning élan qilinish-qilinmasliqi b d t ning kishilik hoquqni qoghdash jehettiki xelq'ara nopuzigha taqishidighan muhim mesile bolup qalghan.