Русийә б д т кишилик һоқуқ кеңишидин чиқириветилгән

Мухбиримиз ирадә
2022-04-07
Share

Бирләшкән дөләтләр тәшкилати омумий кеңиши 7-април күни беләт ташлап, русийәниң украинада “кишилик һоқуқни еғир вә системилиқ дәпсәндә қилғанлиқи” сәвәбидин, б д т кишилик һоқуқ кеңишидин вақитлиқ чиқириветилгәнликини җакарлиған.

Омумий кеңәштики биләт ташлашқа 193 дөләт қатнашқан болуп, 93 дөләтниң қоллиши, 24 дөләтниң рәт қилиши вә 58 дөләтниң аваз бериштин ваз кечиши нәтиҗисидә русийәни б д т кишилик һоқуқ кеңишидин вақитлиқ чиқириветиш қарар қилинған. Хитай болса буниңға қарши аваз бәргән дөләтләрниң қатарида икән.

Мәзкур қарар дуняниң һәрқайси җайлиридики кишилик һоқуқ қоллиғучилириниң күчлүк алқишиға еришкән, улар буни “тарихий вәқә” дәп баһалиған.

Ройтерс агентлиқиниң хәвәр қилишчә, русийәниң б д т да турушлуқ муавин баш әлчиси геннади кузмин беләт ташлаштин кейин сөз қилип, бу һәрикәтни “қанунсиз вә сиясий мәқсәт чиқиш қилинған қәдәм” дәп әйиблигән. У русийәниң б д т кишилик һоқуқ кеңишидин пүтүнләй чиқип кетидиғанлиқини билдүргән.

Американиң бирләшкән дөләтләр тәшкилатида турушлуқ баш әлчиси линда томас-гиринфелд бу һәқтә инкас қайтуруп: “бирләшкән дөләтләр тәшкилати зиянкәшликкә учриғучиларниң азаб-оқубәтлиригә қарап турмайдиғанлиқи тоғрисида ениқ сигнал бәрди,” дегән.

Русийәниң мутләқ көп қисим дөләтләрниң ортақ ирадиси нәтиҗисидә б д т кишилик һоқуқ кеңишидин қоғлап чиқирилиши билән тәң, аз дегәндә бир милйондин ошуқ уйғурни лагерларға қамиған хитайниңму кишилик һоқуқ кеңишидин қоғлап чиқирилиши керәклики һәққидики чоқан вә чақириқлар оттуриға чиқмақта.

Пикирләр (0)

Барлиқ пикир - баянларни көрүш.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.

Толуқ бәт