Русийә билән шималий корейәниң һәрбий һәмкарлиқ шәртнамиси хитайниң шималий корейәдики тәсирини аҗизлаштуруши мумкин

Вашингтондин мухбиримиз әркин тәйярлиди
2024.06.24

Русийә пирезиденти виладимир путинниң өткән һәптә шималий корейә билән имзалиған һәрбий һәмкарлиқ шәртнамиси русийә билән шималий корейәни техиму йеқинлаштурған болуп, бу хитайни әндишигә салған. Хәвәрләрдә, русийә билән шималий корейә арисидики бу шәртнаминиң хитай, русийә вә шималий корейәдин ибарәт үч истибдат дөләт арисидики күч тәңпуңлуқини бузуши мумкинлики, шундақла хитайниң шималий корейәгә болған тәсириниң аҗизлап кетишидин әндишә қиливатқанлиқи илгири сүрүлмәктә.

Бирләшмә агентлиқиниң 21-июн елан қилған бу һәқтики хәвәр анализида көрситишичә, мутәхәссисләр хитай рәһбәрлириниң шималий корейә рәһбири ким җуң ун билән русийә пирезиденти виладимир путинниң шәртнамә имзалишидин кейин, хитай рәһбәрлириниң шималий корейәгә болған йошурун тәсириниң аҗизлап кетишидин вә буниң корейә йерим арилида муқимсизлиқни күчәйтиветишидин әндишигә чүшкәнликини билдүргән.

Бирләшмә агентлиқиниң қәйт қилишичә, бейҗиң даирилири русийә билән шималий корейәниң соғуқ урушидин буянқи әң күчлүк һәмкарлиқиға тақабил турушта зорланмақта икән. Хәвәрдә, хитайниң бир тәрәптин америка вә униң ғәрбтики иттипақдашлириға қарши туруш; йәнә бир тәрәптин, корейә йерим арилида муқимлиқни сақлаштин ибарәт өз ара зиддийәтлик таллашқа дуч кәлгәнлики қәйт қилинмақта. Хитай һөкүмити, русийә билән шималий корейә арисида имзаланған бу шәртнамигә һазирға қәдәр һечқандақ инкас билдүрмигән. Һалбуки, русийә билән шималий корейә арисида имзаланған бу шәртнамә һәр икки дөләттин һәрқандақ бири һуҗумға учриса, йәнә бириниң һәрбий ярдәм бериши тәләп қилинған.

Бирләшмә агентлиқиниң билдүрүшичә, мутәхәссисләр хитайниң бу шәртнамигә қайтурған инкасиниң “интайин аҗиз” икәнлики, бу бейҗиңниң немә қилишни билмәйватқанлиқи, униң қарар чиқиришқа амалсиз қалғанлиқини көрситиду, дәп қаримақта икән. Хәвәрдә йәнә бейҗиңдики бәзи кишиләрниң русийә билән шималий корейәниң һәрбий һәмкарлиқи американиң дуняви һөкүмранлиқ орниға кашила туғдуриду, дәп қарисиму, бирақ хитайда “зор хатирҗәмсизлик барлиқи”, чүнки хитайниң шималий корейәниң русийәниң қолиға чүшүп кетиши, шундақла вәзийити муқимсиз бир ядро қораллар дөлитиниң өз босуғисида пәйда болушини халимайдиғанлиқи билдүрүлгән.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.