Rusiyening tajawuzchiliq urushini qollighan 300 din artuq shirket we shexs amérikaning qara tizimlikige kirgüzülgen

Washin'gtondin muxbirimiz irade teyyarlidi
2024.06.13

Amérika rusiyening ukra'inadiki tajawuzchiliq urushigha yardem bérish bilen eyiblen'gen 300 din artuq shexs we shirketke jaza tedbiri élan qilghan. Ular xitay, jenubiy afriqa, ereb birleshme xelipiliki we türkiye qatarliq döletlerdiki shexs we shirketler iken.

Birleshme agéntliqining xewer qilishiche, amérika maliye ministiri janét yélén 12-iyun künidiki bayanatida, bu jaza tedbirining rusiyening ukra'inadiki urushni dawamlashturush üchün kéreklik matériyal we üskünilerge érishish yollirini késishni meqset qilghanliqini éytqan.

U mundaq dégen: “Biz rusiye bilen pul mu'amilisi qiliwatqan chet el shirketlirige kélidighan xewpni ashuruwatimiz hem ularning jazasiz qélishigha yol qoymasliq üchün tedbir qolliniwatimiz. Biz bu arqiliq rusiyening chet el téxnikisi, üsküniliri, yumshaq détalliri we téxnika mulazimitidin behrimen bolush iqtidarini töwenletmekchimiz.”

Amérika hökümiti teripidin qara tizimlikke élin'ghan shirketler ichide 7 xitay shirkiti bar bolup, ular rusiyege qoral-yaragh sistémisida ishlitishke bolidighan milyon dollar qimmitidiki matériyallarni rusiyege toshughan iken.

Bundin bashqa, amérika soda ministirliqi 12-iyun küni yene xongkonggha jaylashqan 8 xitay shirkitige ayrim-ayrim jaza élan qilghan. Amérika ularni “Rusiyeni yérim ötküzgüch bilen teminlidi” dep eyibligen.

Eng yéngi tedbirlerge asasen, amérika yene “Herbiy sana'et bazisi” gha bolghan éniqlimisini kéngeytip, her qandaq belgilen'gen orunlar bilen soda qilidighan chet el pul-mu'amile organlirigha atalmish ikkilemchi jaza yürgüzüshni yolgha qoyidiken.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.