Америка русийәниң украина урушиға қарита “һазирға қәдәр болған әң қаттиқ җаза тәдбирлириниң бири” ни йүргүзди

Америка малийә министирлиқи 24-феврал йәни русийәниң украинаға қораллиқ таҗавуз қилишиниң нәқ бир йиллиқ хатирә күни “һазирға қәдәр йолға қойған әң қаттиқ җаза тәдбирлириниң бири” ни йүргүзгән. Мәлум болушичә, малийә министирлиқини җаза тәдбири русийәниң метал вә канчилиқ саһәсини, пул-муамилә аппаратлирини, һәрбий тәминләш зәнҗири вә дуня миқясидики москваниң һазир йолға қоюлған җазалаш тәдбирлиридин сақлинишиға ярдәм қилған шәхс вә ширкәтләрни нишан қилған. Малийә министирлиқиниң җаза тәдбири малийә министири җәннет йелленниң хитай вә башқа дөләтләрни қаттиқ агаһландуруп, әгәр бу дөләтләр русийәни материял билән тәминлисә “еғир ақивәткә учрайдиғанлиқи” ни тәкитлишиниң арқисидинла ‍елан қилинған.

Америка симлиқ хәвәрләр тори CNN ниң билдүрүшичә, ақсарайниң мәлуматида һөкүмәтниң 24-февралдин башлап җәмий “русийәниң уруш һәрикитини қоллиған русийә, шундақла явропа, асия, оттура-шәрқ әллиридики 200 дин артуқ шәхс вә аппаратқа қарита җаза йүргүзүлгәнлики”, бу җазаниң санаәтләшкән 7 дөләт гуруһиниң маслишиши билән елип берилғанлиқи билдүрүлгән. Шуниң билән бир вақитта америка ташқи ишлар министирлиқиму русийә армийәсиниң 1219 нәпәр һәрбий хадимиға виза чәклимиси қойған.

Охшаш бир вақитта йәнә 24-феврал күни америка сода министирлиқиму русийә, шундақла хитай вә башқа дөләтләрни өз ичигә алған 3-дөләтниң 90 гә йеқин ширкитигә “експорт чәклимиси” йүргүзгән. Ташқи ишлар министири билинкен: “бу һәптә елан қилинған иқтисадий җаза, експорт контроли қилиш вә таможна беҗи G7 билән маслишиши билән елип берилип, бизниң президент путинға бесим ишлитиштә иттипақдашлиримиз вә шериклиримиз билән давамлиқ һәрикәт қилидиғанлиқимизни көрситиду” дегән. Буниң алдида америка германийәдә өткүзүлгән “мюнхен бихәтәрлик йиғини” да хитай ташқи ишлар министири ваң йини қаттиқ агаһландуруп, әгәр хитай русийәниң украина урушиға ярдәм “еғир ақивәткә учрайдиғанлиқи” ни ейтқан.