Amérika rusiyening ukra'ina urushigha qarita “Hazirgha qeder bolghan eng qattiq jaza tedbirlirining biri” ni yürgüzdi

Amérika maliye ministirliqi 24-féwral yeni rusiyening ukra'inagha qoralliq tajawuz qilishining neq bir yilliq xatire küni “Hazirgha qeder yolgha qoyghan eng qattiq jaza tedbirlirining biri” ni yürgüzgen. Melum bolushiche, maliye ministirliqini jaza tedbiri rusiyening métal we kanchiliq sahesini, pul-mu'amile apparatlirini, herbiy teminlesh zenjiri we dunya miqyasidiki moskwaning hazir yolgha qoyulghan jazalash tedbirliridin saqlinishigha yardem qilghan shexs we shirketlerni nishan qilghan. Maliye ministirliqining jaza tedbiri maliye ministiri jennét yéllénning xitay we bashqa döletlerni qattiq agahlandurup, eger bu döletler rusiyeni matériyal bilen teminlise “Éghir aqiwetke uchraydighanliqi” ni tekitlishining arqisidinla ‍élan qilin'ghan.

Amérika simliq xewerler tori CNN ning bildürüshiche, aqsarayning melumatida hökümetning 24-féwraldin bashlap jem'iy “Rusiyening urush herikitini qollighan rusiye, shundaqla yawropa, asiya, ottura-sherq elliridiki 200 din artuq shexs we apparatqa qarita jaza yürgüzülgenliki”, bu jazaning sana'etleshken 7 dölet guruhining maslishishi bilen élip bérilghanliqi bildürülgen. Shuning bilen bir waqitta amérika tashqi ishlar ministirliqimu rusiye armiyesining 1219 neper herbiy xadimigha wiza cheklimisi qoyghan.

Oxshash bir waqitta yene 24-féwral küni amérika soda ministirliqimu rusiye, shundaqla xitay we bashqa döletlerni öz ichige alghan 3-döletning 90 ge yéqin shirkitige “Éksport cheklimisi” yürgüzgen. Tashqi ishlar ministiri bilinkén: “Bu hepte élan qilin'ghan iqtisadiy jaza, éksport kontroli qilish we tamozhna béji G7 bilen maslishishi bilen élip bérilip, bizning prézidént putin'gha bésim ishlitishte ittipaqdashlirimiz we shériklirimiz bilen dawamliq heriket qilidighanliqimizni körsitidu” dégen. Buning aldida amérika gérmaniyede ötküzülgen “Myunxén bixeterlik yighini” da xitay tashqi ishlar ministiri wang yini qattiq agahlandurup, eger xitay rusiyening ukra'ina urushigha yardem “Éghir aqiwetke uchraydighanliqi” ni éytqan.