Ukra'ina urushida rusiye resmiy “Miq” qa üsti

Muxbirimiz eziz
2022.03.30
Share on WhatsApp
Share on WhatsApp

Ukra'inadiki urush weziyiti barghanséri éghirlishiwatqan bolup, buning bir muhim mezmuni tinchliq söhbitide 30-mart künimu héchqandaq ilgirileshning bolmighanliqi hemde rusiyening urushqa qatnashqan herbiy qisimlirining éghir talapet yégenliki, shu sewebtin rusiye hökümitining urushqa ewetken qisimlarni “Rusiye we bélorusiyege chékindürüp tertipke sélish” heqqide qarar élishi bolmaqta.

NBC Agéntliqining 30-marttiki xewiride éytilshiche, rusiye dölet mudapiye ministiri sérgéy shoygu “Herbiy jehettiki talapetni zembirek we rakéta hujumliri toldurushi mumkin” dep agahlandurush bergen. Bu agahlandurush amérika we ukra'ina hökümetliri rusiyening kiyéw etrapidiki herbiy hujumni azaytish heqqidiki bayanatliridin guman qilidighanliqini bildürgendin kéyin otturigha chiqqan. Buning bilen rusiyening yéqin kelgüside hujumni toxtitish éhtimalining yoq ikenliki téximu éniq bolghan.

En'gliye bash weziri boris jonson bu heqte söz qilip: “Rusiye armiyesi ukra'inadin toluq chékinip chiqmighuche, gherp dunyasi rusiyege qaratqan jazani bikar qilmasliqi lazim” dégen. Amérika prézidénti jow baydén 30-mart küni chüshtin burun ukra'ina prézidénti zélénski bilen téléfonda sözleshken hemde “Biz rusiyege qaritilghan jazani we ukra'inagha yardem bérishni izchil dawam qilimiz” dégen. Amérika yene ukra'inagha yéngidin 500 milyon amérika dolliriliq yardem béridighanliqini jakarlighan.

Halbuki, ukra'ina urushi heqqidiki xewerlerdede éniq qilip: “Urush tüpeylidin ukra'ina uchrighan biwaste iqtisadiy ziyan alliqachan bir tirilyon amérika dolliridin éship ketti” déyilgen. Nöwette urush weyranchiqiliqidin qéchip bashqa döletlerde panahliniwatqan ukra'ina puqralirining sani töt milyon'gha yetken.

“El jezire” ning 30-marttiki xewiride éytilishiche, nöwette rusiyening yürikini tom qiliwatqan bir muhim amil yawropaning néfit we tebi'iy gazda rusiyege qarashliq bolup qéliwatqanliqi iken. Nöwette rusiyedin tebi'iy gaz import qilishtiki eng muhim döletlerning biri bolghan gérmaniye rusiyedin tebi'iy gaz sétiwélishni toxtitish we bu mesilini ottura sherq arqiliq hel qilishni jiddiy oylashmaqta iken. Ukra'ina musapirlirini eng köp qobul qilghan qoshna döletlerning biri bolghan polsha bolsa 2023-yili yéngi yil künidin bashlap rusiyening gaz we néfitigha qarashliq bolush dewrige xatime béridighanliqini jakarlighan.

Nöwette bezi analizchilar “Rusiye ukra'inani parchilashqa urunushi mumkin” déyishmekte iken. Gerche rusiye prézidénti putin mawripul shehrining tézdin teslim bolushini telep qilghan bolsimu, emma ukra'inaning qarshiliqi téximu kücheygen. Jümlidin kiyiw shehrining bashliqi bolghan sabiq “Bokis shahi” witali kilichkoning inisi bilen birlikte herbiy forma kyi'ip ukra'ina armiyesi bilen bir sepke tizilghanliqi, ukra'ina xelqining boysunmas iradisini janliq namayen qilghanliq, dep qaralmaqta iken.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.

Toluq bet