Русийәниң украинадики мәғлубийити хитайға савақ берәмду?

19-Апрел “америка бирләшмә агентлиқи” да елан қилинған бир мақалидә тәһлил қилинишичә, русийәниң украинаға һуҗум қилған әскәрлириниң талапәткә учрап қайта рәткә селиниши, қара деңиздики уруш парахотиниң чөктүрүветилиши қатарлиқ бирқатар мәғлубийәтләр русийәниң аҗизлиқини ашкарилап, хитайниму өзиниң һәрбий күчини қайта дәңсәшкә мәҗбурлиған.

Мақалидә мундақ дейилгән: “хитайму русийәгә охшаш өзиниң һәрбий күчини сабиқ совет иттипақиға тәқлид қилған асаста шәкилләндүргән. Мутәхссиләрниң билдүрүшичә, ши җинпиң қатарлиқ хитай рәһбәрлири русийәниң украинаға һуҗум қилғандин кейин ашкариланған аҗизлиқини инчикә тәһлил қилмақта. Чүнки хитай һөкүмити “азадлиқ армийә” сени ишқа селип тәйвәнни өзигә қошувалмақчи болса, бу аҗизлиқлардин савақ орнида пайдилиниши мумкин”.

Он нәччә йилдин бери русийә армийәси бир қатар ислаһат вә заманивилишиш қурулушидин кейин гирузийә, чечәнистан, сүрийә урушлирида ғәлибә қазанған вә қиримни ютувалған болсиму украина урушида өзиниң аҗизлиқини ашкарилиған. Мутәхәссисләрниң қаришичә, хитай армийәси 1979-йилдин буян түзүк җәң қилип бақмиған болуп, русийәгә қариғанда җәң қилиш тәҗрибиси аз икән; хитай әскәрлириниң җәңгиварлиқиму төвән болуп, хитай пуқралири ялғуз пәрзәнтини өлүмгә йолға селишни халимайдикән. Хитайниң җәң қораллириму русийәниңкидин анчә пәрқләнмәйдиған кона қораллар болуп, заманивилишиш дәриҗисини юқири дегили болмайдикән. Бундақ бир армийәниң мурәккәп җәң вәзийитидә ғалиб чиқалиши тәскә тохтайдикән, русийәниң украинадики мәғлубийитиму буни ениқ көрситип бәргән.