Украина уруши кәскинләшкән бир пәйттә русийә билән хитай техиму қоюқ мунасивәт орнитишқа вәдиләшкән

Украина уруши кәскинләшкән бир пәйттә, йәни 30-декабир хитай рәһбири ши җинпиң билән русийә президенти владимир путин екран сөһбити өткүзүп, икки тәрәп мунасиветини техиму чоңқурлаштурушқа вәдиләшкән. Мәлум болушичә, икки тәрәп “гео-сиясий җиддийлик” вә “мүшкүл хәлқара вәзийәт” тә москва билән бейҗиңниң мунасивитини күчәйтишини мәдһийәлигән, виладимир путин хитай билән болған һәрбий һәмкарлиқни күчәйтиш арзусини билдүргән.

Ройтерс агентлиқиниң хәвәр қилишичә, путин ши җинпиңға мундақ дегән: “сиз билән мән ғәрбтин келиватқан мислисиз бесим вә иғвагәрчилик алдида, йәр шари гео-сиясий мәнзирисидә давамлишиватқан өзгиришләрниң сәвәблири, җәрияни вә логикиси һәққидә ‍охшаш пикиргә игә.”

Ройтерс агентлиқиниң ейтишичә, сөһбәттә ши җинпиң хитайниң асаслиқ експорт базири болған ғәрб дөләтлирини азрақ тәнқид қилған болсиму, лекин хитайниң дунядики мәвҗут “мүшкүл” вәзийәт астида, русийә билән истратегийәлик һәмкарлиқни күчәйтишкә тәйяр икәнликини ейтқан. Сөһбәттә йәнә русийә президенти путин хитай рәһбири ши җинпиңни келәр йили баһарда русийәгә қарита дөләт ишлири зияритидә болушқа тәклип қилған. Путинниң ейтишичә, “бу пүткүл дуняға русийә билән хитайниң ‍ачқучлиқ мәсилиләрдики мунасивитиниң күчлүк икәнликини көрситип беридикән”. Путин йәнә хитай билән болған һәрбий һәмкарлиқини күчәйтиш мәқситиниңму барлиқини билдүргән.

Лекин ройтерс агентлиқиниң ейтишичә, хитай тәрәпниң бу сөһбәт тоғрисиики рәсмий мәлуматида, икки тәрәпниң иттипақдашлиқ мунасивитидики пәрқләр гәвдиләндүрүлүп, зиярәт тәклипи, шундақла һәрбий һәмкарлиқни күчәйтиш тәлипи тилға елинмиған. Мәлум болушичә, хитай русийәниң украинаға таҗавуз қилишини тәнқид қилиштин өзини қачуриватқан болсиму, әмма ғәрбниң имбаргосидин әнсирәп, русийәгә бивастә маддий ярдәм бериштин еһтият қилмақта икән.