Rus-xitay munasiwetliridiki yoshurun ziddiyetler kücheymekte

Muxbirimiz ümidwar
2017-12-24
Share

2017-Yili, rusiye bilen xitay arisidiki her tereplime munasiwetler kücheygen shuningdek ikki dölet rehberliri öz'ara munasiwetlirige izchil yuqiri bahalarni bérip kéliwatqan bolsimu, emma rusiye-xitay munasiwetlirige yenila dez kétiwatqanliqi, ikki dölet arisidiki yoshurun ixtilaplarning küchyiwatqanliqi bildürülmekte.

Amérika awazi teripidin élan qilin'ghan bu heqtiki bir parche maqalide körsitilishiche, ukra'ina kirzisidin kéyin rusiyening gherb bilen bolghan munasiwetlirining yiriklishishi netijiside rusiyening xitay bilen bolghan munasiwetliri kücheygen. 2017-Yili, rusiyening gherb bilen, jümlidin amérika qoshma shtatliri bilen bolghan munasiwetliri téximu nacharlishishi netijiside rusiye özining xitaygha qaratqan siyasitide üstünlükini yoqitip qoyushqa bashlighan. Moskwa béyjingning özining mundaq qiyin ehwalidin öz paydisigha paydilinishidin narazi bolmaqta.

Bu yil ikki dölet sodisi 80 milyard dollargha yetküzülgen bolsimu, emma rusiyening xitay bilen bolghan bu sodisida qizil reqemliri körülgen. Rusiye xitaygha néfit, tebi'iy gaz, yaghach matériyalliri we bashqa xam matériyallarni chiqiriwatqan bolup, xitay bolsa rusiyege asasliqi kündilik turmush mehsulatliri, éléktr saymanliri we eslihelerni chiqirishni dawamlashturmaqta.

Rusiye gherbning iqtisadiy émbargosigha uchrap xelq turmushi qiyinlashqandin kéyin, rusiyening soda jehette xitaygha yölinishi téximu kücheygen, rusiye gherbke taqabil turushta xitaygha téximu bekrek tayinishqa mejbur bolup, xitay üstün orun'gha ige bolghan. Ene shu sewebtin rus metbu'atlirida öktichi pikirdikiler "1950-Yillarda sowét ittipaqi xitayning chong akisi idi, mana emdi nöwet xitaygha keldi" deydighan qarashlarnimu otturigha qoyushqan. Hetta, xelq ichide rusiye hökümitining bir qisim yerlirini xitaygha térish üchün sétip bérishige, bayqal köli sulirini xitaygha toshushqa we bayqal rayonini xitayning échishigha, rusiyening ilghar qoralliri we téxnikisini xitaygha sétishqa qarshi chiqish choqanlirimu kücheygen.

Rusiye metbu'atlirida hazir xitay tehditige a'it maqaliler we inkaslarmu hessilep köpeygen bolup, rusiyening "Ribaku" torida "Xitay rusiyening eng düshmini" namliq bir inkas maqalisi élan qilinip, rusiyening xitayning qed kötirishidin endishe qilidighanliqi, xitayning héchqachan rusiye teripidin bésiwélin'ghan zéminlirini untup qalmaydighanliqini yazghan.

Amérika awazining maqaliside körsitilishiche, rusiye öktichi "Alma" partiyesi rehbiri yawlénskiy xitayning héchqachan rusiyening istratégiyelik ittipaqdéshi bolalmaydighanliqini éytqan. U: "Xitay rusiyeni özining xam eshya bazisi qilmaqchi" dep tenqid qilghan.

Rusiye istratégiye mutexessisi konowalow rusiye bilen xitayning herbiy ittipaqdashliqining emelge ashmaydighanliqi, rusiyening hergizmu xitay terepte turup, wiyétnam we yaponiyege qarshi chiqmaydighanliqini bildürgen. U yene rusiye bilen xitay arisida öz'ara ishenmeslik mewjutluqini körsetken.

Mutexessislerning qarishiche, xitaymu rusiyege nisbeten ichki naraziliqqa ige bolup, chünki, rusiye xitayning amérika bilen bolghan jenubi déngiz ixtilapi, xitayning hindistan bilen bolghan ixtilapigha chette qarap turush siyasiti qollan'ghan, yeni ashkara xitayni qollash meydanida turmighan.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.