Русийә билән хитайниң һәмкарлиқни күчәйтиш һәққидики сөзлири диққәт қозғимақта

Бирләшмә агентлиқниң 19-сентәбирдики хәвиридә ейтилишичә, кремил сарийиниң юқири дәриҗилик әмәлдарлиридин николай патрушев (Nikolai Patrushev) шу күни русийә билән хитай оттурисидики һәмкарлиқниң техиму күчийидиғанлиқини, буниңдики асаслиқ мәқсәтниң бирликтә ғәрбкә тақабил туруш икәнликини билдүргән. Бу хәвәр тарқалғандин кейин хәлқарада зор ғулғула қозғалди.

“русийә федератсийәси бихәтәрлик кеңиши” (SCRF) ниң баш катипи болған николай шу күни москвада зиярәттә болуватқан хитай ташқи ишлар министири ваң йиға “биз русийә-хитай мунасивитини күчәйтиш арқилиқ икки тәрәп оттурисидики өзара шериклик вә истратегийәлик һәмкарлиқта актип тәрәққиятларни вуҗудқа кәлтүрүшни истәймиз” дегән. Шундақла нөвәттә ғәрб дунясиниң русийә вә хитайни қисмаққа елишни җиддийләштүриватқанлиқини, бундақ әһвалда икки тәрәп һәмкарлашмиғанда бу хилдики “қисмаққа елиш” һәркитигә тақабил турғили болмайдиғанлиқини әскәрткән.

“торонто юлтузи” гезитиниң 19-сентәбирдики хәвиридә ейтилишичә, ваң йи бу қетимқи москва зияритидә үстигә алған йәнә бир вәзипә русийә президенти виладимир путинниң өктәбир ейидики бейҗиң зияритигә мунасивәтлик бир қисим ишларни тамамлаш икән. Хәвәрдә ейтилишичә, николай патрушев, “русийә һәрқачан хитай һөкүмитиниң тәйвән, шинҗаң вә хоңкоң һәққидики сиясәтлирини қоллайду” дегән. Бу һал өз нөвитидә ғәрб дуняси билән болған мунасивити бирдәк яманлишиватқан русийә вә хитайниң өз һәмкарлиқини техиму юқири пәллигә елип чиқишқа тиришиватқанлиқини көрсәткән. Шундақла хитайниң немә үчүн изчил түрдә русийәниң украинаға таҗавуз қилишини ашкара әйибләп бақмиғанлиқи һәмдә русийәни һәрбий вә иқтисадий җәһәттин йошурун қоллап келиватқанлиқидики бәзи сәвәбләрни ашкарилап бәргән.