Natogha eza döletler rusiye-xitay ittipaqigha qarshi turushta birlikke kelgen

Ixtiyariy muxbirimiz jewlan
2022.06.30
Share on WhatsApp
Share on WhatsApp
Natogha eza döletler rusiye-xitay ittipaqigha qarshi turushta  birlikke kelgen Xitay dölet re'isi shijingping bilen puttining resimi namayshchilarning taxtisida
Reuters

 28-Iyun küni bashlan'ghan shimaliy atlantik okyan ehdi teshkilati (NATO) gha eza döletlerning bashliqlar yighinida rusiye bilen xitayning xelq'ara tehditige qarshi birlik sep hasil bolghan.

“Nyu-york waqti géziti” ning xewer bérishiche, natogha eza döletler bashliqliri bu yighinda tajawuzchi rusiyeni asasliq reqib,  uninggha yardem bériwatqan xitayni istratégiyelik “Xiris” dep atighan hemde bu rezil ittipaqqa qandaq taqabil turush mesilisini muzakirileshken.

Xewerde körsitilishiche, nato eslide soghuq munasiwetler urushi mezgilide gherb döletlirining sabiq sowét ittipaqigha qarshi shekillendürgen herbiy ittipaqi bolsimu, sowét ittipaqi yimirilgendin kéyin rusiyeni reqib emes, belki yoshurun dost qatarida körgen؛ xitayni bolsa étibargha almighan.  Emma bügünki rusiye sabiq sowét ittipaqining yolidin méngip, xitayni özige hemrah qilip, xelq'aragha tehdit peyda qilghanliqi üchün, nato bu ikki dölet ittipaqini chong tehdit dep hésablighan. Yeni natogha eza döletler bu qétim xitaynimu nishan'gha alghan bolup, xitayning “Istratégiyelik xiris” dep ashkare atilishi yéngi bir burulush nuqtisi hésablinidiken.

Bu yighinda natoning bash katipi jéns stolténbérg (Jens Stoltenberg)  natoning yéngi wezipisi élan qilghanda: “Xitay bilen rusiyening barghanséri küchiyiwatqan istratégiyelik hemkarliqi we ularning xelq'ara tertipni buzush gherizi bizning qimmet qarashlirimiz we menpe'etlirimizge tamamen zittur” dégen. U natoning sherqiy qanitidiki 8 döletke nechche minglighan yéngi qoshun orunlashturidighanliqini jakarlighan. Amérika prézidénti jow baydén polshagha quruqluq armiye bash shitabi we dalada jeng qilish bataliyoni quridighanliqini bildürgen. Xitay bularning héchqaysisigha téxi inkas qayturmighan.

 

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.