Хитай һөкүмити уйғур елидики чоң тутқунда хизмәт көрсәткән 2 орун билән 6 шәхсни мукапатлиған

Мухбиримиз әркин
2021-04-14
Share

Хитайниң мәмликәтлик баш ишчилар уюшмиси 13-април уқтуруш елан қилип, уйғур елидики чоң тәқиб вә тутқунда хизмәт көрсәткән 2 орун билән 6 нәпәр шәхскә 2021-йиллиқ "1-май әмгәк мукапати" вә "авангарт әмгәкчи" нами бәргән. Мәлум болушичә, бу йиллиқ мукапатлашта хитайниң мәмликәтлик җамаәт хәвпсизлик системисидики 4 орун вә 17 шәхс "1-май әмгәк мукапати" ға, 14 орун "авангарт әмгәкчи" намиға лайиқ көрүлгән.

Бу мукапатниң диққәт қиларлиқ нуқтиси "1-май әмгәк мукапати" ға хитайниң мәмликәт миқясидики 4 орунниң бириниң вә 17 шәхсниң төт нәпириниң уйғур аптоном районида болуши, болупму уларниң үч нәпириниң уйғур болушидур. Көзәткучиләр уйғур елидики юқириқи бир орун вә төт шәхсниң 2017-йили башланған чоң тутқунда актип рол ойниғанлиқини илгири сүрмәктә. Һалбуки, хитайниң бу мәзгил ичидики бастуруши америка, канада, голландийә қатарлиқ доләтләр тәрипидин "ирқий қирғинчилиқ" дәп елан қилинди.

"шинҗаң хәвәрлири" ториниң билдүрүшичә, или сәксән өйлүк чегра тәкшүрүш понкити, бортала шәһәрлик җ. Х. Идарисиниң муавин башлиқи абдурәһим юнус, җиң наһийәлик җ. Х. Идарисиниң муавин башлиқи аман реһим, қәшқәр конашәһәр наһийә ташмилиқ сақчиханисиниң башлиқи тохтаҗи мәмәттурсун қатарлиқлар "1-май әмгәк мукапати" ға еришкән орун вә шәхсләр болуп, қәшқәр вилайәтлик җ. Х. Идаириси алаһидә сақчи әтритиниң алаһидә уруш қилиш баш әтрити болса "авангарт әмгәкчи" намиға еришкән.

Пикирләр (0)

Барлиқ пикир - баянларни көрүш.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.

Толуқ бәт