Уйғур елидики сақчи органлиридин 18 коллектип билән 37 нәпәр шәхскә бейҗиңда мукапат берилгән

Мухбиримиз қутлан
2017-05-22
Елхәт
Пикир
Share
Принт

Чен чүәнгониң уйғур елида йүргүзүватқан бир йүрүш қаттиқ қол сиясәтлири хәлқара җәмийәтниң диққитини қозғаватқан бир пәйттә хитай мәркизий һөкүмити бейҗиңда тәнтәнилик мурасим өткүзүп җ. Х. Системиси бойичә хизмәт көрсәткән коллектип вә шәхсләргә мукапат бәргән.

«Үрүмчи кәчлик гезити» ниң бу һәқтики хәвиригә қариғанда, хитай даирилири бу қетим уйғур елидики сақчи органлиридин 18 коллектип билән 37 нәпәр шәхсни таллап чиқип мукапат бәргән.

Уларниң ичидә куча наһийәлик җ. Х. Идариси, ғулҗа шәһәрлик җ.Х. Идариси, қәшқәр йеңи шәһәр наһийәлик җ. Х. Идариси қатарлиқ 18 коллектип билән ғулҗа шәһәрлик җ. Х. Идариси 1-чоң әтрәтниң муавин башлиқи нурзаман мөмин, уйғур аптоном районлуқ җ. Х. Назарити 21-башқармиси 1-тармақ әтрәтниң башлиқи дилшат қейюм қатарлиқ 38 шәхс мукапатланған.

Мукапатлаш йиғинида хитай бойичә җамаәт хәвпсизлики системисидики «1-дәриҗилик қәһриман нәмуничи», хотән вилайәтлик җ. Х. Идарисиниң муавин башлиқи, қошумчә қарақаш наһийәлик җ. Х. Идарисиниң сиясий комиссари мурат шерипҗан хитайдики 10 даңлиқ сақчиниң бири сүпитидә сөз қилған.

Көзәткүчиләр, хитай һөкүмити бейҗиңға чақиртип алаһидә мукапат бәргән юқириқи сақчи хадимлириниң әмәлийәттә өз юртидики милләтдашлирини, йәни йәрлик уйғурларниң әң әқәллий яшаш тәләплирини рәһимсизлик билән бастурған вә «хизмәт көрситип» юқириға ямишишни мәқсәт қилған инсанлар болуши мумкинликини тәхмин қилмақта.

Пикирләр (0)
Share
Толуқ бәт