Қарақашлиқ сақчиниң муқимлиқни сақлаш хизмитидә чарчап өлгәнлики муназирә қозғиди

Мухбиримиз меһрибан
2013-07-16
Share

Хитайниң һөкүмәт хәвәрлиридә 12-июл күни хотән қарақаш наһийиси маңлай сақчиханисиниң башлиқи 43 яшлиқ әхмәт тохти мәттурсунниң 25 күн өйигә қайтмай, муқимлиқ хизмити ишлигәнлик сәвәбидин, чарчап өлгәнлик хәвири берилгәндин кейин, бу хәвәр хәлқара мәтбуатлар вә тордашлар арисида җиддий инкас қозғиди.

Хәлқара мәтбуатларда, хитай даирилириниң муқимлиқни сақлаш намида уйғурларға қарита елип бериватқан бастуруши уйғурларниң наразилиқини қозғиғандин башқа, бу сиясәтни иҗра қилғучи асасий қатламлардики сақчи, кадирларниңму вәзипә иҗра қилиш җәрянида охшашла еғир бесим вә юқири бәдәл төләштәк паҗиәлик қисмәткә йолуқуватқанлиқи илгири сүрүлди.

Хитайниң аммиви торлиридики муназириләрдә болса, нөвәттә уйғур елидики наһийә, йезилардики сақчихана, һәтта адәттики хизмәт орунлирида ишләйдиған асасий қатлам кадирлириниңму муқимлиқни сақлаш хизмитигә сәпәрвәр қилинип, һәрбий мәшиқ елип бериватқанлиқи, кечә-күндүз демәй өй ахтуруш, өй чарлаш җәрянида һәддидин зиядә хизмәт бесими вә чарчаш сәвәбидин тиналмиғудәк һалға кәлгәнлики қатарлиқ әһваллар инкас қилинди.

Уйғурбиз торида бүгүн бу һәқтә берилгән хәвәрдә дейилишичә, ақчи наһийисидә 40 яштин төвән болған барлиқ һөкүмәт кадирлири, рамзан мәзгилидә террорлуққа қарши туруш һәрбий мәшиқигә орунлаштурулған. Улар күндүзи томуз иссиқида нормал хизмитини қилғандин башқа, һәр күни кәчқурунлуқи йәнә, бешиға полат қалпақ кийип, қоллириға қалқан көтүргән һаләттә һәрбий мәшиқ елип баридиған болуп, рамизанда һөкүмәт кадирлириниң шәнбә, йәкшәнбилик дәм елишму бикар қилинған.

Үндидар қатарлиқ аммиви тор бекәтлиридә инкас қилинишичә, нөвәттә үрүмчи, санҗи, ақсу қатарлиқ шәһәрләрдики идарә кадирлириму җәмийәт муқимлиқини сақлаш хизмитигә чүшүрүветилгән.

Пикирләр (0)

Барлиқ пикир - баянларни көрүш.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.

Толуқ бәт