Сақчи даирилири уйғур дияридики тор абунитлирини тикток қатарлиқ әпләрни қачилимаслиқ һәққидә агаһландурди

Вашингтондин мухбиримиз әркин тәйярлиди
2024.04.08

Хитайниң уйғур дияридики сақчи даирилири мәхсус видийолуқ уқтуруш тарқитип , райондики тор абунитлирини тикток, X йәни бурунқи тиветтер, ютуб, биткойин қатарлиқ иҗтимаий алақә әплирини йүклимәсликни, йүклигәнләрниң қануний җавабкарлиққа тартилидиғанлиқини агаһландурған. Уйғур дияридики җ х тармақлириниң дойин қатарлиқ иҗтимаий алақә супилирида тарқатқан еланлирида агаһландурушичә, әгәр тор абунитлири юқириқи иҗтимаий таратқу әплирини қачилиса қолға елинидикән, 15 миң йүән җәриманә қоюлуп, иҗтимаий ишәнч кредитидин 40 номур тартилидикән.

 Хитай һөкүмәт әмәлдарлири  тикток, X йәни тиветтер, линкидин, фейсбук, ютюб қатарлиқ иҗтимаий алақә супилирида һесаб ечип, уйғур ирқий қирғинчилиқи вә мәҗбурий әмгәкни инкар қилишта кәң пайдилиниватқан болсиму, лекин уйғур дияридики җ х тармақлириниң уқтуруш чиқирип, тор абунитлирини агаһландуруши, болупму хитайниң байт дәнс ширкитигә қарашлиқ тиктокниңму чәтәл ширкәтлири қатарида агаһландурулуши диққәт қозғимақта.

Райондики хитай җ х тармақлириниң бу агаһландуруши, уйғур аптоном районлуқ парткомниң өткән һәптә мәхсус йиғин чақирип, “шинҗаңға мунасивәтлик мәхпийәтликләрни қаттиқ қоғдаш” ни тәләп қилишиниң арқисидинла елан қилинған. Хитай даирилириниң “шинҗаңға мунасивәтлик мәхпийәтликләрни қаттиқ сақлаш” ни тәләп қилиши вә арқидинла җ х тармақлириниң тор абунитлирини агаһландуруши, уйғурларға “ирқий қирғинчилиқ” қилиш билән әйиблиниватқан хитайниң, буниңға аит техиму көп дәлилләрниң ашкарилинип кетишидин әндишә қилидиғанлиқини көрситиду, дәп қаралмақта. Буниң алдида райондики җ х тармақлири  алтай, чөчәк, ақсу қатарлиқ җайлардин нурғун кишиләрниң торда “өсәк сөз” тарқитиш билән әйиблинип җазаланғанлиқини билдүргән. Җ х тармақлириниң агаһландурушичә, райондики тор абунитлириниң “мәйли қандақ мәқсәттә болсун” чегра сиртидики тор бекәтлиригә киришниң һәммиси “тосуқ атлап торға чиқиш қилмиши” һесаблинидикән.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.