“Sayahetchi” qiyapitige kiriwalghan xitay jasus gumandarliri alyaskadiki herbiy bazigha kirmekchi bolghan

“Amérikada bügün” (USA TODAY) namliq xewer torining bildürüshiche, yéqinqi yillardin buyan “Sayahetchi” qiyapitige kiriwalghan xitay jasus gumandarlirining amérikaning alyaska shitatigha jaylashqan sezgür herbiy bazilargha suqunup kirish qilmishliri bir qanche qétim yüz bergen.

Bir qisim herbiy emeldarlar we herbiylerning bu xewer orginigha bildürüshiche, shundaq weqelerning biride xitay puqraliri aptomobil bilen alyaskaning feyrbenkis (Fairbanks) rayonidiki fort wéynrayt (Fort Wainwright) herbiy bazisining bixeterlik tekshürüsh ponkitidin ötüp ketken. Aptomobil axiri toxtitilip axturulghanda, aptomobil ichidin ademsiz uchqu (dron) tépilghan. Aptomobildiki xitaylar bolsa özlirining sayahet qiliwétip ézip ketkenlikini ilgiri sürgen.

Armiye ichidiki ehwaldin xewerdar kishilerning bildürüshiche, bundaq ézip qalidighan ishlar bezide yüz bersimu, emma ular bu weqeni amérikaning alyaskadiki herbiy iqtidarini tekshürüsh urunushi, dep qaraydiken. Bu herbiy mexpiyetlik bolghanliqi üchün, ular weqe heqqidiki bashqa tepsilatlar üstide toxtalmighan.

Amérika armiyesining bir emeldari mundaq dégen: “Alyaska shitatida sayahetchidek körün'genlerning hemmisi sayahetchi emes, ular emeliyette chet el jasusi.”

Xewerde déyilishiche, bundaq “Sayahetchi” qiyapitidiki kishiler barghan jaylirigha sezgür uchurlarni alalaydighan sénzorlarni qaldurup qoyushi mumkin iken. Xitayning washin'gtondiki elchixanisi “Amérikada bügün” xewer torining weqe heqqidiki so'aligha jawab bermigen.

Amérika fédératsiye tekshürüsh idarisining bashliqi kristofir wray yéqinda qilghan bir sözide, fédératsiye tekshürüsh idarisining her 12 sa'ette bir qétim xitay hökümitining qollishidiki jasusluq weqesi délosi üstidin tekshürüsh bashlaydighanliqini éytqan.

2019-Yili amérikaning filorida shitatida déngiz armiyesi awi'atsiye ponkiti bolghan kiy wést (Key West) rayonini qanunsiz süretke tartqan bir xitay oqughuchi bir yilliq qamaq jazasigha höküm qilin'ghan. Eyni chaghda bu oqughuchining adwokati uning “Ézip qalghan sayahetchi” ikenlikini ilgiri sürgen bolsimu, emma bu xitay oqughuchining kamérasida we téléfonida peqetla ayrodromning süriti tartilghan iken. Shundaqla bu orunning sayahet nuqtisi emes, belki amérikaning F-35 uchquchiliri meshiq qilidighan déngiz armiye bazisi ikenliki éniq yézilghan iken.