Dunya Uyghur qurultiyi qazaqistan sotining sayragül sawutbay heqqidiki hökümini tebriklidi

Muxbirimiz shöhret hoshur
2018-08-01
Share

Dunya Uyghur qurultiyi bügün, yeni 1‏-awghust küni bayanat élan qilip, qazaqistan sotining Uyghur rayonidin qéchip kelgen sayragül sawutbayni xitaygha qayturmasliq heqqide chiqarghan hökümini tebriklidi.

Bayanatta qazaqistanning bu nöwet heq we adaletni yaqlighanliqigha apirin oqughan dunya Uyghur qurultiyi qazaqistanning sayragülning kechmishi we uning qolidiki pakitlargha asasen xitayning Uyghur rayonida yürgüzüwatqan zorawanliqlirini tonup yétishini ümid qilidighanliqini bildürdi. Yéqinqi 10 yil ichide qazaqistan, pakistan, tayland qatarliq döletlerdin 300 ge yéqin Uyghurning xitaygha mejburiy qayturuwétilgenliki eslitilgen bayanatta nöwette siyasiy panahliq sepiride ongushsizliqqa uchrighan Uyghurlardin malayshiyaning qolida 11 kishi, bulghariyening qolida 5 kishi barliqi, bularghimu xitayning qol sozup turuwatqanliqi tekitlen'gen. Bayanatta yene xitayning qol sozushi bilen chégradin chiqirilish xewpige duch kéliwatqan Uyghur tutqunlarning teqdiri bu döletlerning sotchilirining hökümige baghliq bolup turuwatqanliqi, bu döletlerning qazaqistanni ülge élishi kérekliki isharet qilindi.

Bayanatning axirida dunya Uyghur qurultiyi qazaqistanni xitayning Uyghur diyarida yürgüzüwatqan insanliqqa qarshi jinayetlirige süküt qilmasliqqa, sayragül sawutbay délosida körsetken adalitini Uyghur diyaridin kelgen bashqa siyasiy panahlan'ghuchilar üchünmu dawamliq körsitishke chaqiriq qildi.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.

Toluq bet