Хитай һөкүмити уйғур дияридики төт наһийәниң секретарини тәқдирлиди

Мухбиримиз әзиз
2021.06.30

Хитай һөкүмити өзлириниң “компартийә қурулғанлиқиниң йүз йиллиқини тәбрикләш” паалийәтлириниң бир қисми сүпитидә чира, гума, маралбеши вә шаяр наһийәлириниң хитай секретарлирини тәқдирлиди.

Хитай һөкүмити башқурушидики “тәңритағ тори” ниң 29-июндики хәвиридә ейтилишичә, бу төт наһийәниң секретарлири “мәмликәтлик мунәввәр наһийә секретарлири” дегән тәқдирнамигә еришкән. Хәвәрдә бу шәхсләрниң сиясий мәйданиниң қәтий болғанлиқи, шуниңдәк әмәлий төһписиниң зор икәнлики алаһидә тәкитләнгән.

“шинҗаң гезити” ниң 28-июндики хәвиридә болса бейҗиңда чақирилған “иккидә мунәввәр бирдә илғар” болғанларни тәқдирләш йиғинида уйғур дияридики сақчи хадимлири вә партийә ячейкилириниң рәһбәрлири болуп 19 шәхсни һәмдә 11 орунни “алаһидә шәрәп” мукапати билән тәқдирлигәнлики тилға елиниду.

Муһаҗирәттики көзәткүчиләр хитай һөкүмитиниң бу һәрикитини “хитай һөкүмранлар гуруһини уйғурларни бастурушта техиму йүрәклик болушқа риғбәтләндүргәнлик” деди. Америкадики мустәқил анализчи илшат һәсән бу тоғрисида тохтилип; “хитай һөкүмити уйғурларниң қаршилиқ һәрикити әң көп йүз бәргән наһийәләрдики хитай секретарларни, шуниңдәк уйғурларни бастурушта актип хизмәт көрсәткән сақчи хадимлирини мукапатлаш арқилиқ шәрқий түркистандики уйғурларни бастуруш һәрикитини йоллуқ қилип көрситишкә урунмақта. Бу уларниң таҗавузчилиқ тәбиитини техиму ашкара намаян қилиду” деди.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.