Sémaforning xitay merkiziy birliksep bölümige munasiwetlik organ bilen hemkarlishishi tenqidke uchridi

Amérikadiki “Sémafor” (Semafor) xewer torining “Xitay yer sharilishish merkizi”(CCG)  dep atalghan bir bir tetqiqat merkizi bilen hemkarliq ornatqanliqini jakarlishi, küchlük diqqet qozghidi.

“Foks” xewerlirining éytishiche, “Xitay yersharilishish merkizi” dep atalghan bu orunning qurghuchisi wang xuyaw xitay kompartiyesi merkizi birliksep bölümi bilen munasiwetlik kishi iken.

“Sémafor” ning jakarlishiche, ular xitaydiki bu tetqiqat orni bilen birliship, “Xitay we yer shari sodisi” namliq teshebbusni yolgha qoyghan, ular bu arqiliq “Algha ilgirilesh yolini izdewatqan dunya soda rehberliri üchün yéngi supa berpa qilishni ümid qilghanliqini” bildürgen. Wang xuyaw bolsa mezkur teshebbusni yaqlighuchi xitay meslihetchiler komititining ezasi bolup, u oxshash waqitta xitay merkizi birliksep qarmiqidiki bir qanche guruppiningmu meslihetchi ezasi iken.

Awstiraliye istratégiyilik siyaset tetqiqat merkizining bildürüshiche, “Xitay yer sharilishish merkizi” xitay kompartiyesi merkizi birliksep bölümining chet ellik ixtisasliqlarni izdesh we ularni qobul qilish üchün ishlitidighan “Muweppeqiyetlik heriketliri”ning biri iken.

“Sémafor”ning bu herikiti bir qisim amérika dölet mejlis ezalirining küchlük tenqidige uchrighan. Kéngesh palata ezasi marko rubiyo bu heqte tiwittérda “Amérika shirketlirining hélihem xitaygha oxshash irqiy qirghinchiliq hakimiyiti bilen hemkarlishishni arzu qilishi kishini heyran qalduridu. “Sémafor” bilip turup xitay kompartiyesining teshwiqatchiliri we ezaliri bilen hemkarlishishni tallidi” dep yazghan.

Marko rubiyo we rik skot qatarliq mejlis ezaliri sözliride “Emdi bu xewer orgini dégen héchqandaq gepke ishen'gili bolmaydighanliqi”ni bildürüshken.

Melum bolushiche, “Sémafor” namliq xewer orgini 2022- yili qurulghan bolup, uning qurghuchisi we bash muherriri eslidiki bozfid xewerler torining sabiq bash muherriri ben simis (Ben Smith) iken.