Xitay da'iriliri 2017‏ yilighiche 500 mingdek Uyghur balisini "Yataqliq mektepler" ge orunlashturghan

Muxbirimiz erkin
2019-12-30
Share

Xitay hökümitining 2017‏-yili 500 mingdek Uyghur ottura-bashlan'ghuch mekte oqughuchisini a'ilisidin ayrip, "Yataqliq mektepler" ge orunlashturghanliqi, balilarning bu mekteplerde ana tili we medeniyitidin ayrip tashlan'ghanliqi ashkarilandi. Xitay hökümiti 2009‏-yili yüz bergen "5‏-Iyul weqesi" din kéyin Uyghur rayonida xitay tilini omumlashturush pilanini otturigha qoyghan. "Dölet tilini omumlashturush" namida otturigha qoyulghan bu pilanda 2020‏-yilghiche xitay tilini yerlik milletlerde pütünley omumlashturup bolush nishan qilin'ghanidi. "Nyu-york waqti" gézitining xewer qilishiche, xitay hökümiti 2017‏-yilning bashlirigha qeder Uyghur bashlan'ghuch we ottura mektep oqughuchiliridin 497 ming balini a'ilisi we medeniyitidin ayrip, hökümetning "Yataqliq mektepliri" ge orunlashturup bolghan.

"Nyu-york waqti" gézitining 28‏-dékabir élan qilghan xewiride, xitay ma'arip ministirliqining 2017‏-yili chüshürgen Uyghur rayoni heqqidiki bir höjjiti neqil keltürülgen. Mezkur höjjette tekitlinishiche, yerlik da'iriler Uyghur balilirini "Yataqliq mektepler" ge orunlashturushni eng muhim wezipe qilip tutup, 2017‏-yilning bashlirigha qeder "Yataqliq mektepler" ning oqughuchi sanini az kem 500 minggha yetküzgen. Xewerde, "Yataqliq mektepler" ge orunlashturulghan balilarning eng kichikining 8 yash ikenliki, mezkur pilanning ulardiki diniy étiqat we musulman qimmet qarishini yoqitishni meqset qilghanliqi tekitlen'gen. "Nyu-york waqti" gézitining xewiride qeyt qilinishiche, xitay ma'arip ministirliqining höjjitide xitay bash sékritari shi jinpingning sözi neqil keltürülgen bolup, uning "Ma'arip zorawan esebiylikni yoqitish, shinjangning bashqurushning eng muhim qorali" dégenliki ilgiri sürülgen.

Xewerde yene "Yataqliq mektepler" diki balilarning a'ilisi bilen her ikki heptide bir qétim kürüshtürülidighanliqi, ana tilida sözleshke ruxset qilinmaydighanliqi tekitlinip, mutexessislerning mezkur "Yataqliq mekteplerni "Ménge yuyush orni" dep körsetkenliki ilgiri sürülgen.

Pikirler (0)

Barliq pikir - bayanlarni körüsh.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.

Toluq bet