Әрәб бирләшмә хәлипилики хитайниң аталмиш “террорлуққа қарши күриши” ни қоллайдиғанлиқини билдүргән

Әрәб бирләшмә хәлипиликиниң вәлиәһди муһәммәд бин зайид ал-наһян 22-июл бейҗиңдики зияритидә хитайниң уйғур диярида елип бериватқан аталмиш “террорлуққа қарши күриши” ни күчлүк йосунда қоллайдиғанлиқини билдүргән.

Пакистанда чиқидиған “сүбһи” (Dawn) гезитиниң 23-июлдики хәвиригә қариғанда, муһәммәд бин зайид уйғур дияриниң вәзийити һәққидә ши җинпиңға сөз қилип, “әрәб бирләшмә хәлипилики хитай һөкүмитиниң аз санлиқ милләтләрниң һоқуқини қоғдаш җәһәттики тиришчанлиқлириға йүксәк дәриҗидә қайил,” дегән. Униң бу сөзлири хитай мәркизий телевизийә қанилида аңлитилған.

Хәвәрдә илгири сүрүлүшичә, муһәммәд бин зайид сөзидә әрәб бирләшмә хәлипиликиниң хитай билән бирликтә “ашқун террорчи күчләр” гә зәрбә бериштики “бирләшмә җәңгә” қатнишидиғанлиқини, йәни бейҗиң даирилири уйғурларни “террорчи” дәп көрситиштә “баһанә” болуватқан аталмиш “шәрқий түркистан ислам һәрикити” ни йоқитишта һәмдәмдә болидиғанлиқини қәйт қилған.

Хәвәрдин мәлум болушичә, муһәммәд бин зайидниң юқириқи сөзлири бейҗиң даирилириниң уйғурлар мәсилисидә хәлқарадин чиқиватқан наразилиқ пикирләргә тақабил туруш үчүн “дост издиниватқан” мәзгилигә тоғра кәлгән.

12-Июл хитайниң уйғур елидики сияситини қоллап б д т ға хәт язған 37 дөләтниң ичидә әрәб бирләшмә хәлипиликиму бар иди. Демократик әлләр бу дөләтләрниң қилмишиға күчлүк рәддийә бериватқан пәйттә муһәммәд бин зайидниң хитай зиярити хәлқараниң диққәт нуқтисиға айланған.

Көзәткүчиләр, әрәб бирләшмә хәлипиликигә охшаш бир мусулман дөлитиниң бу қилмиши униң уйғурлар мәсилисидин өзини қачуруп хитайға “янтаяқ” болуватқанлиқидин башқа нәрсә әмәс, дейишмәктә.