Оттура асия уйғур әдиблири арисида тонулған шаирә хәйриниса турди вапат болди

Мухбиримиз үмидвар
2016.11.27


Оттура асия җумһурийәтлиридә тонулған уйғур шаирәлиридин бири, журналист хәйриниса турди йәкшәнбә күни қирғизистанниң бишкәк шәһиридә 72 йешида вапат болуп, қайғулуқ мурасим билән дәпнә қилинған.

Хәйриниса турди 1944-йили уйғур дияриниң чөчәк шәһиридә туғулған вә 1961-йили үрүмчидә юқири оқуш орнини тамамлап, 1962-йилидики, уйғур,қазақ вә башқа милләтләрниң совет иттипақиға көчүп кетиш һәрикитидә совет иттипақиға кетип, бишкәк шәһиригә йәрләшкән.

Хәйринса турди 1970-йиллардин башлап әдәбий иҗадийәткә киришип, илгири-кейин алматада чиқидиған “коммунизм туғи”, йәни кейинки “уйғур авази” гезити, “пәрваз”, “арзу” журналлирида вә 1990-йиллардин кейинки башқа уйғур вә қирғиз мәтбуатлирида көплигән шеирларни елан қилған.

Оттура асия җумһурийәтлиридики сани наһайити аз уйғур аял шаирәлириниң алдинқи қатаридин орун алған хәйринса турди қирғизистан язғучилар иттипақиниң әзаси болған һәмдә униң уйғур вә қирғиз тиллирида “үмидим мениң ата юрт”, “җан сирим” қатарлиқ шеир топламлири нәшир қилинип тарқитилған.

Хәйриниса турди талантлиқ журналист болуп, у узун йиллар қирғизистан радио-телевизийә идарисиниң уйғур тилидики радио аңлитишини башқурған вә өзи мухбир һәм диктор болуп ишләп, қирғизистан һөкүмити тәрипидин тәқдирләнгән иди.

Тонулған аяллар паалийәтчиси, бир мәзгил “иттипақ” җәмийити аяллар кеңишиниң рәисилик вәзиписини өтигән хәйриниса турди йәнә америка вә башқа бир қисим әлләрдә өткүзүлгән уйғур җәмийәтлириниң йиғинлириғиму иштирак қилған иди.

Хәйринса турдиниң дадиси исмаил дамолла чөчәктә өткән мәшһур алимларниң бири болуп, униң 1946-1949-йиллири арисида 11-әсирдә өткән уйғур алими махмут қәшқәриниң “түрки тиллар дивани”ни һазирқи заман уйғур тилиға тәрҗимә қилғанлиқи һәққидә учурлар мәвҗут.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.