Ottura asiya Uyghur edibliri arisida tonulghan sha'ire xeyrinisa turdi wapat boldi

Ottura asiya jumhuriyetliride tonulghan Uyghur sha'ireliridin biri, zhurnalist xeyrinisa turdi yekshenbe küni qirghizistanning bishkek shehiride 72 yéshida wapat bolup, qayghuluq murasim bilen depne qilin'ghan.

Xeyrinisa turdi 1944-yili Uyghur diyarining chöchek shehiride tughulghan we 1961-yili ürümchide yuqiri oqush ornini tamamlap, 1962-yilidiki, Uyghur,qazaq we bashqa milletlerning sowét ittipaqigha köchüp kétish herikitide sowét ittipaqigha kétip, bishkek shehirige yerleshken.

Xeyrinsa turdi 1970-yillardin bashlap edebiy ijadiyetke kiriship, ilgiri-kéyin almatada chiqidighan “Kommunizm tughi”, yeni kéyinki “Uyghur awazi” géziti, “Perwaz”, “Arzu” zhurnallirida we 1990-yillardin kéyinki bashqa Uyghur we qirghiz metbu'atlirida köpligen shé'irlarni élan qilghan.

Ottura asiya jumhuriyetliridiki sani nahayiti az Uyghur ayal sha'irelirining aldinqi qataridin orun alghan xeyrinsa turdi qirghizistan yazghuchilar ittipaqining ezasi bolghan hemde uning Uyghur we qirghiz tillirida “Ümidim méning ata yurt”, “Jan sirim” qatarliq shé'ir toplamliri neshir qilinip tarqitilghan.

Xeyrinisa turdi talantliq zhurnalist bolup, u uzun yillar qirghizistan radi'o-téléwiziye idarisining Uyghur tilidiki radi'o anglitishini bashqurghan we özi muxbir hem diktor bolup ishlep, qirghizistan hökümiti teripidin teqdirlen'gen idi.

Tonulghan ayallar pa'aliyetchisi, bir mezgil “Ittipaq” jem'iyiti ayallar kéngishining re'isilik wezipisini ötigen xeyrinisa turdi yene amérika we bashqa bir qisim ellerde ötküzülgen Uyghur jem'iyetlirining yighinlirighimu ishtirak qilghan idi.

Xeyrinsa turdining dadisi isma'il damolla chöchekte ötken meshhur alimlarning biri bolup, uning 1946-1949-yilliri arisida 11-esirde ötken Uyghur alimi maxmut qeshqerining “Türki tillar diwani”ni hazirqi zaman Uyghur tiligha terjime qilghanliqi heqqide uchurlar mewjut.