Хитай адвокат хуаңпу дәрясида еқип кәлгән өлүк чошқа вәқәсини тәкшүрүшни тәләп қилди

Икки ай илгири шаңхәйдә йүз бәргән, нәччә миңлиған өлүк чүшқиларниң хуаңпу дәрясидин еқип келиш вәқәси хитай тор бекәтлиридә һелиму муназирә темиси болмақта.

Йеқинда ли җүн исимлик бир адвокат торда очуқ хәт елан қилип, даириләрдин өзиниң бу йил 3 - айниң оттурилирида шаңхәй шәһәрлик муһит асраш идарисиға йезилған “өлүк чошқиларниң хуаңпу дәрясидин еқип келиш вәқәсини аммиға ашкарилаш тәлипи” ниң немә үчүн һазирғичә җавабсиз қалдурулғанлиқини сүрүштә қилған.

Бу йил 5 - март күни хуаңпу дәрясиниң юқири еқинға җайлашқан җеҗяң өлкисидики чошқа фермилири тәрипидин ташливетилгән он нәччә миң чошқиниң өлүки сүзүвелинған болсиму, әмма шаңхәй шәһәрлик һөкүмәт даирилири бу вәқәдин кейинму шаңхәй шәһиридики ичимлик суда булғиниш көрүлмигәнликини тәкитләп, пуқраларға хуаңпу дәрясиниң сүйи арқилиқ тәминлинидиған ичимлик суни хатирҗәм истимал қилса болиғанлиқини уқтурған иди. Әмма 4 - айдин башлап шаңхәй қатарлиқ шәһәр, өлкиләрдә тарқалған х7н9 типлиқ қуш зукими вируси шаңхәй қатарлиқ җайлардики хәлқтә вәһимә пәйда қилип, хуаңпу дәрясида байқалған өлүк чошқиларниңму бу хил зукам вируси билән юқумлинип өлгән болуши мүмкинлики һәққидә түрлүк пәрәзләр оттуриға қоюлған иди.