Шаңхәй һәмкарлиқ тәшкилатиниң башлиқлар йиғини қошма ахбарат елан қилди

Мухбиримиз әркин
2019-06-17
Елхәт
Пикир
Share
Принт

Шаңхәй һәмкарлиқ тәшкилатиниң өткән һәптә қирғизистан пайтәхти бишкәк шәһиридә өткүзүлгән башлиқлар йиғини қошма ахбарат елан қилди. Униңда әза дөләтләр оттурисидики һәмкарлиқни күчәйтиш, мәзкур районниң бихәтәрликигә капаләтлик қилиш қатарлиқ мәсилиләр тәкитләнгән.

Қошма ахбаратта, әза дөләтләрниң террорлуқниң һәр хил шәкил вә аламәтлирини бирдәк тәнқидләйдиғанлиқи әскәртилип, хәлқара җәмийәтни террорлуққа қарши туруш күришини б д т ни мәркәз қилиш, хәлқара һәмкарлиқни алға сүрүш, дөләтләрниң игилик һоқуқи вә мустәқиллиқиға һөрмәт қилиш асасида елип беришқа чақиридиғанлиқи тәкитләнгән. 

Мәзкур йиғин хитай һөкүмити 2 милйондәк уйғур, қазақ вә башқа мусулман хәлқләрни йиғивелиш лагерлириға қамап, уйғур җәмийитигә қарита омумйүзлүк диҗитал тәқибләшни йолға қоюватқан мәзгилдә өткүзүлгән. Хитайниң қилмиши хәлқара кишилик һоқуқ тәшкилатлириниң вә ғәрб дөләтлириниң қаттиқ тәнқидигә учриған болсиму, лекин мусулман дөләтләр вә оттура асиядики җумһурийәтләр буниңға изчил сүкүт қилип кәлгән яки хитайни қоллап кәлгәниди. 

14‏-Июн күни өткүзүлгән йиғинға русийә президенти путин, хитай рәиси ши җинпиң, қирғизистан президенти соронбай җеенбекоф қатарлиқлар, шуниңдәк һиндистан, пакистан, қазақистан, өзбекистан, таҗикистан қатарлиқ әза дөләтләр рәһбәрлири вә иран президенти роһаний қатнашқан. Йиғинниң һарписида русийә президентиниң ярдәмчиси юри ушакоф йиғинда нуқтилиқ әза дөләтләрниң бихәтәрлик, террорлуққа қарши туруш, зәһәрлик чекимлик әткәсчилики, иқтисади тәрәққият, санаәт вә иҗтимаий һәмкарлиқни күчәйтиш қатарлиқ мәсилиләрниң музакирә қилинидиғанлиқини билдүргәниди. 

Бу қетимқи йиғин америка-хитай сода уруши интайин кәскинләшкән бир мәзгилдә чақирилди. Анализчиларниң илгири сүрүшичә, сода уруши хитай иқтисадида қаттиқ тәсир қилип, униң бир бәлвағ бир йол пилани мәбләғ йетишмәсликтәк җиддий риқабәткә дуч кәлгән. Анализчилар. Бу әһвал бу нөвәтлик йиғинда ши җинпиңни пассип әһвалға чүшүрүп қоюп, башқа дөләтләрни актип орунға чиқарғанлиқини илгири сүрмәктә.

Пикирләр (0)
Share
Толуқ бәт