Чен чуәнго вә шөһрәт закир ш һ т дики дөләтләрниң чегра мудапиә вәкилләр өмики билән көрүшкән

Мухбиримиз әркин
2017-06-29
Share

Уйғур аптоном районлуқ партком секретари чен чуәнго 26‏-июн үрүмчидә шаңхәй һәмкарлиқ тәшкилати (ш һ т) дики дөләтләрниң чегра мудапиә вәкилләр өмики билән көрүшүп, "3хил күчләр" гә зәрбә беришни давамлиқ ш һ т ниң әң муһим вәзиписи қилишни тәләп қилған.

Мәзкур вәкилләр өмики шаңхәй һәмкарлиқ тәшкилатиға әза 6 дөләтниң қирғизистан-хитай террорлуққа қарши чегра мудапиә маневириға қатнишидиған бихәтәрлик әмәлдарлирини өз ичигә алған.

Хитай ахбаратиниң хәвәрлиридә, көрүшүшкә уйғур аптоном райониниң рәиси шөһрәт закирниң қатнашқанлиқини билдүргән. Йиғинда чен чуәнго ши җинпиңниң йеқинда қазақистан пайтәхти астанада қилған сөзини нәқил кәлтүрүп, " ‹3хил күчләр' гә қарши туруш йәнила күрәшниң әң муһим һалқиси. Биз бурунқиға охшашла район бихәтәрлики вә муқимлиқини қоғдашни ш һ т хизмитиниң алдинқи вәзиписи қилишимиз керәк" дегән.

Ш һ т илгири бәзи хәлқара кишилик һоқуқ тәшкилатлириниң тәнқидигә учриған. Улар бу тәшкилатни хитайниң бөлгүнчилик, террорлуқ вә диний радикаллиққа бәргән бәргән мүҗмәл тәбирини қобул қилип, униң уйғурларни бастурушиға янтаяқ болди, дәп тәнқидләп кәлгән иди.

Үрүмчидики көрүшүш хитай билән қирғизистанниң "террорлуқ" қа қарши чегра маневири башлиништин бир күн бурун елип берилған.
Қирғиз вә хитай чегра мудапиә қисимлириниң 27‏-июн ш һ т ниң намида өткүзүлгән "тәңри там ‏‏-3" намлиқ мәзкур маневириға 700 адәм иштирак қилған.

Маневирни шаңхәй һәмкарлиқ тәшкилатидики хитай, русийә, қирғизистан, таҗикистан, өзбекистан, қазақистан қатарлиқ 6 дөләтниң чегра мудапиә, һәрбий, җ х, ички ишлар саһәсидики әмәлдарлар тәклип қилған болуп, маневир уйғур райониға қорал-ярақ йөткәшкә қарши турушни мәзмун қилған иди.

Пикирләр (0)

Барлиқ пикир - баянларни көрүш.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.

Толуқ бәт