Һиндистан вә пакистанниң “шаңхәй һәмкарлиқ тәшкилати” ға рәсмий әзалиқи җакарланди

Мухбиримиз ирадә
2017.06.09
Share on WhatsApp
Share on WhatsApp

Фирансийә агентлиқиниң хәвәр қилишичә, җүмә күни “шаңхәй һәмкарлиқ тәшкилати” һиндистан билән пакистанниң тәшкилатқа әза болуп қобул қилинғанлиқини рәсмий һалда җакарлиған. Һиндистан вә пакистан рәһбәрлири һәр иккиси бәргән баянатлирида тәшкилатта актип вә иҗабий рол ойнайдиғанлиқини билдүрүшкән.

Пакистан билән һиндистан икки дөләт арисидики мунасивәт кәшмир мәсилиси сәвәбидин изчил йирик болуп кәлгән болсиму, әмма “шаңхәй һәмкарлиқ тәшкилати” ниң һазир астанада ечиливатқан йиғинида икки дөләт рәһбириниң қол елишип көрүшкәнлики, бейҗиң вә москваниңму бу икки дөләт мунасивитиниң яхшилинишиға үмид билән қариғанлиқи хәвәр қилинмақта. 

Мәлум болушичә, бу “шаңхәй һәмкарлиқ тәшкилати” 2001- йили қурулғандин буян тунҗи қетим әза санини көпәйтиши болуп, буниң билән шаңхәй һәмкарлиқ тәшкилати әң көп земин вә нопусни өз ичигә алған район характерлик бир тәшкилат болуп қалған. Бирақ, фирансийә агентлиқи хәвиридә, бу тәшкилатниң символ характерлик тәшкилатлиқини, хитай бир яқта бир бәлвағ, бир йол истратегийиси бойичә өз тиҗаритини қилса, русийәниң йәнә бир яқта “явру-асия иқтисад һәмкарлиқи” тәшкилати арқилиқ өз тиҗаритини қиливатқанлиқини баян қилған. 

Хитай башчилиқида қурулған “шаңхәй һәмкарлиқ тәшкилати” ниң русийә, қазақистан, өзбекистан, таҗикистан вә қирғизистан қатарлиқ 6 рәсмий әзаси бар иди. Һиндистан вә пакистанниң қошулуши билән рәсмий әза сани 8 гә йәтти. Шаңхәй һәмкарлиқ тәшкилати әза дөләтләр ара һәрбий һәмкарлиқни илгири сүрүш мәқсәт қилған бир тәшкилат болуп, нурғун көзәткүчиләр хитай һөкүмитиниң бу тәшкилатни уйғур елидики һакимийитини қоғдап қелиш үчүн қурғанлиқини илгири сүриду.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.