“Uyghur yashliri teshebbusi herikiti” gérmaniyediki “Shé'in” dukini aldida naraziliq bildürdi

Gérmaniye “Uyghur yashliri teshebbusi herikiti” ning pa'aliyetchiliri yéqinda xitayning dangliq moda kiyim markisi “Shé'in” (Shein) ning frankfurt shehiridiki dukinida Uyghur mejburiy emgikige qarshi naraziliq namayishi ötküzgen. Ular dukan'gha kirip yuqiri awazda “Shé'in” ning Uyghur mejburiy emgikige chétishliq ikenlikini tekitligen hemde xéridarlarni “Shé'in” ning mehsulatlirini sétiwalmasliqqa chaqirghan. Ijtima'iy taratqulardiki uchurlarda “Shé'in” ning frankfurt shehiridiki bir soda sariyida échilghan bu dukinining téxi yéqindila soda bashlighanliqi qeyt qilinmaqta.

 “Uyghur yashliri teshebbusi” ning neq meydan sin körünüshliridin melum bolushiche, bir qanche namayishchi yash dukandiki xéridarlargha “Milyonlighan Uyghur oghul-qizliri yillardin béri yötkep emgekke sélinmaqta… biz a'ilimiz bilen yillardin béri alaqilishalmaywatimiz” dep chaqiriq qilghan, shundaqla “Shé'in” ning mehsulatlirining erzan bolushidiki seweb uning Uyghur mejburiy emgikidin paydilinish ikenlikini bildürgen.

Neq meydan widiyosidin bir namayishchining “Uyghur irqiy qirghinchiliqi rasttur” dégen kichik lozunka kötürüwalghanliqi, namayishchilarni dukandiki bixeterlik xadimliri dukandin mejburiy sirtqa chiqiriwetken bolsimu, sirtta dawamliq naraziliq bildürgenliki körülmekte. Bu qétimliq pa'aliyet gherb elliride “Shé'in” ning mehsulatlirini cheklesh sadaliri küchiyiwatqan, “Shé'in” ning london aksiye bazirida pay chéki tarqitishini cheklesh telep qilin'ghan, shuningdek amérika dölet mejlisining bir qisim ezaliri bu 2024-yili 5-ayda amérika aksiye oboroti komitétigha mektup yollap “Shé'in” ning herqandaq mehsulatida Uyghur mejburiy emgikining yoqluqini ispatlishi lazimliqini otturigha qoyghan peytte élip bérilghan.

Melum bolushiche, “Uyghur yashliri teshebbusi herikiti” ni gérmaniyediki Uyghur we bir qisim türk, gérman qizliri 2022-yili qurup chiqqan bolup, ular izchil Uyghur qirghinchiliqigha qarshi türlük ammiwi pa'aliyetler bilen shughullinip kelmekte.