Ши җинпиң «икки йүзлимичиләр» ни қезип чиқиришни қәтий давамлаштурушни тәкитлигән

Мухбиримиз ирадә
2019-01-23
Елхәт
Пикир
Share
Принт

Уйғур елида йолға қоюлған аталмиш «икки йүзлимичиләр» гә қарши күрәш қилиш һәрикитиниң әмди пүтүн хитай миқясида омумлаштурулидиғанлиқи мәлум болмақта.

Хитайниң «хәлқ тори» да тарқитилған бир хәвәргә қариғанда, йеқинда хитай дөләт рәиси ши җинпиң хитай мәркизий комитети сиясий бюросиниң йиғинида сөз қилғанда сиясий җәһәттики «икки йүзлимичи» ләрни йоқитиш тоғрисида мәхсус тохталған. У сөзидә «икки йүзлимичи» ләрниң «наһайити күчлүк йошурунуш иқтидариға вә аздурушчанлиққа игә икәнлики» ни, шуңа уларға қарши күрәштики мутләқ ғәлибини қолға кәлтүрүш үчүн «икки йүзлимичи» ләрни «давамлиқ пәрқләндүрүп тазилаш вә сиясий екеологийәни саплаштуруш» ниң зөрүрлүкини тәкитлигән.

Хитай һөкүмити 2017-йилидин буян уйғур елида «икки йүзлимичи» ләрни қезип чиқириш һәрикити қозғиған вә бу арқилиқ нурғун уйғур әмәлдарлирини вә уйғур зиялийлирини «қайта тәрбийәлиниш» үчүн лагерларға қамиған болса, уларниң ичидики саттар савут, ташполат тейип, халмурат ғопур қатарлиқ бир қисим юқири дәриҗилик көзгә көрүнгән сәрхилларға кечиктүрмә өлүм җазаси бәргән иди.

Чәтәлләрдики уйғур көзәткүчиләрниң қаришичә, ши җинпиң һөкүмити уйғур елидики бу аталмиш «икки йүзлимичи» ләргә қарши туруш һәрикитини давамлиқ күчәйткәндин башқа, уни әмди пүтүн хитай миқясида омумлаштурушқа һазирлиниватқан болуши мумкин икән.

Чәтәлләрдики көзәткүчиләр йәнә уйғур елини хитай һөкүмитиниң өз сиясәтлирини синақ қилидиған «тәҗрибә мәйдани» дәп көрсәтмәктә.

Пикирләр (0)
Share
Толуқ бәт